Nei Strategie bei WebtaxiNuetstariffer méi bëlleg an eng nei App op Lëtzebuergesch

Um Méindeg de Mueren hu Voyages Emile Weber a Benelux Taxis eng nei Taxi-App ugekënnegt.

Web-Taxi: Nei Strategie (13.02.2017)
Méi gënschteg Präisser an eng besser Offer.

Nei Servicer, eng méi performant App, een neien Optrëtt a méi attraktiv Präisser. Hei soll de Client, wéi bei aneren Taxi-Appen am Ausland, kënne säin Taxi per App bestellen a schonn direkt de Präis gesot kréien.

Webtaxi huet um Méindeg de Mueren een neit Konzept presentéiert. An dat passt och an d'Mobilitéitskonzept vun der Regierung.

Webtaxi / Reportage Eric Hamus



D'Taxiwiese wier natierlech ee Complement an der Mobilitéit-Ketten, esou den Transportminister François Bausch.

Et wier eng Dynamik drakomm, déi de François Bausch sech gewënscht hat. D'Gesetz wier kloer gewiescht, mä Kreativitéit vum Marché wier ëmmer wëllkomm gewiescht. De Marché hätt hei ganz séier op d'Mobilitéit-Konzept reagéiert.

Ee Kärstéck vum neie Konzept ass déi nei Taxi-Zentral, esou de Porte-Parole vun Webtaxi, Cyrille Horper. Domadder kéint een dem Client ganz nei Servicer bidden.

D'App wier ganz leeschtungsstaark. Et kréich een direkt ugewisen, a wéi vill Minutten den Taxi do wier. Et géif een aginn, wou een hiwéilt a scho géif een den Tarif ugewise kréien, esou de Cyrille Horper. Den Tarif wier och de garantéierte Präis. Esou kéim et zum Schluss och net zu Iwwerraschungen.

An Zukunft gëtt dann och den Trafic an der Präis-Rechnung berécksiichtegt.

Hei wier de Virdeel, dass Owes- a Nuetstariffer géife méi bëlleg ginn, esou de Cyrille Horper. Do géif ee mat sengen eegene Präisser erofgoen. Och bei méi laangen Trajete géifen d'Präisser falen. Do géif et bis zu 25%, par rapport zu den eegenen Tariffer, méi gënschteg ginn. Et wieren awer bis zu 40% par rapport zur Konkurrenz.

Fir den Transportminister François Bausch huet dat neit Gesetz domadder scho Friichte gedroen. A knapp 5 Méint hätt een et duerch déi nei Gesetzer fäerdeg bruecht, déi "schwaarz Schof" ewechzekréien, esou den Transportminister. Anerersäits hätt een Innovatioun an de System kritt. D'Präisser géifen erofgoen an d'Qualitéit hätt sech verbessert. Dem François Bausch no hätten och Null-Emissioun Taxien immense Succès. Do hätt een 80 Demanden erakritt. De Marché hätt eng richteg Dynamik kritt.

Fir den Transportminister ass et awer och wichteg ze ënnersträichen, datt Entreprise wéi Uber weider wëllkomm wieren. Si misste sech awer, wéi all di aner och, un d'Lëtzebuerger Gesetzer halen. 

Weider Servicer vun der App:

D'App garantéiert, dass de Chauffer muss déi kierzt Streck fueren. Google Maps ass am System mat abegraff, esou dass een déi genau Adress op där ee sech befënnt, net muss kennen.

D'App wäert och a 5 Sprooche kënne benotzt ginn, dorënner och Lëtzebuergesch.

PDF: Communiqué Webtaxi (fr)
PDF: Communiqué Webtaxi (de)

Méi doriwwer um Méindeg den Owend op der Tëlee an natierlech och hei op RTL.lu.