VIDEO: CO2-EmissiounenBis 2025 sollen nei Autoe 15% manner CO2 ausstoussen

Elo wou driwwer diskutéiert gëtt, wéi mir eis Loft méi propper kréien, wieren d'Virschléi vun der Komissioun ee katastrophaalt Signal.

Autoe mat manner CO2-Emissiounen (08.11.2017)
Elo wou driwwer diskutéiert gëtt, wéi mir eis Loft méi propper kréien, wieren d'Virschléi vun der Komissioun ee katastrophaalt Signal.
An Zäiten, wou zu Bonn op der Weltklimakonferenz driwwer verhandelt gëtt, wéi d'Klimaziler vu Paräis kënnen ëmgesat ginn, publizéiert d'EU-Kommissioun um Dënschdeg hier Pläng, wat d'Grenzwäerter vun CO2-Emissioune vun Autoen ugeet. Bis d'Joer 2030 sollen déi, der Kommissioun no ëm 30% zréckgoen, dat ass ee katastrophale Signal fir d'Verhandlunge vu Bonn a geet op kee Fall duer, soen Ëmweltschützer.

D'Ofgaser aus den Auspuffen, ee vun den Haaptveruersaacher vu schiedlechen CO2-Emissiounen. Elo seet d'EU-Kommissioun, dass nei Autoe bis d'Joer 2025, 15% manner CO2 sollen ausstoussen, bis d'2030, 30%.

"D'Kommissioun hat Intern selwer Etüden, déi gewisen hunn, dass Europa op d'mannst 60% bei den Autoe misst erofgoen. Si maachen der elo 30%. Wat den Här Juncker elo a Saache vu Klimaschutz virgeluecht huet, ass immens enttäuschend," sou de Claude Turmes.

Zwar si Strofe virgesinn, fir deen dee sech net drun hält, mä déi si lächerlech, soen déi Gréng. "Déi Strofe sinn zwar haart, awer den Drock op d'Automobilisten ass esou mëll, dass am Endeffekt wahrscheinlech ni eng Strof wäert fälleg ginn," mengt de gréngen Europadeputéierten. 

Och a Saachen E-Mobilitéit setzt d'Kommissioun sech nei Ziler, bis 2030 sollen 30% Elektroautoen um Marché sinn. Duerfir gëtt et, fir d'CO2-Ziler, Bonuspunkte fir d'Autoskonzerner, wa bis 2015 méi wéi 15% a bis 2030 méi wéi 30% vun hire Venten emissiounsaarm Gefierer sinn.

"Europa ass net um richtege Wee," mengt de Miguel Arias Cañete, EU-Kommissar fir Klimaschutz, "Am Moment mécht d'Vente vun den Elektro-Autoen nëmmen 1% aus. De Konsument huet de Choix tëschent 6 verschiddene Modeller. An Asien sinn et der iwwer 400." 

Effektiv verpasst Europa hei komplett den Uschloss, mä déi néi Reegelung hëlleft do näischt, seet de Claude Turmes, hei hätt ee misse mat feste Quote fueren: "Tesla baut attraktiv Autoen. D'Chinese gi massiv a Richtung Elektro-Autoen, well et do an a Kalifornien eng Quote gëtt fir esou Autoen. Elo schléit den Här Juncker eng ridicule niddreg Quote vu 15% am neie Verkaf bis 2025 vir an domat hofft hien, dass d'europäesch Autosindustrie viru kënnt. Dat kann net klappen."

Fir d’Paräisser Klimaziler ze erreechen, missten op d'mannst 60% CO2-Emissioune reduzéiert ginn, esou nach de Claude Turmes.  

CO2-Emissiounen - vum Frank Elsen

    



Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.