Virun de ChamberwalenACL setzt sech fir eng global Mobilitéitspolitik an

Den Automobilclub wëll fir seng ronn 180.000 Membere wëssen, wéi eng Partei am meeschten op senger Linn läit.

© ACL

Eng drëtt Spur fir d'Areler Autobunn, d'Prioritéite fir d'Contournemente vun Dippech, Ettelbréck a Feelen a keng weider Taxen oder Fuerverbueter fir d'Chaufferen - alles dëst sinn Revendicatioune vum Automobilclub am Virfeld vun de Walen. Et gëtt kee Blat virun de Mond geholl, well den ACL sech als staark Automobiliste-Lobby mat engen 180.000 Memberen am Réck gesäit.

Revendikatioune vum ACL - Reportage Roy Grotz



PDF: Dokument wat déi politesch Parteie geschéckt kruten

Duerfir trëtt een och virun de Walen un d'Parteien erun a freet Faarf ze bekennen, wat d'Käschte vun der Mobilitéit, d'Gestioun vum dagdeeglechen Trafic an d'Verkéierssécherheet ugeet.


PDF: 3 Froen un d'politesch Parteien an d'Analys vun den Äentwerten

Den ACL selwer ass dann och revendicatif a seet, datt d'deeglech Immobilitéit - also d'Stauen - e wichtegen Käschtefakteur fir d'Wirtschaft an all Mënsch géif duerstellen - duerfir misst konsequent an eng intelligent a global Mobilitéitspolitik investéiert ginn - dat awer ouni wëllen op den "tout-auto" ze setzen, wéi et heescht.

Et wier nach z'acceptéieren, wa beim Autoskaf oder um Sprit Taxe géifen ufalen, mä et dierft net zu weidere repressiven Taxen oder Fuerverbueter kommen - dëst géif da besonnesch kleng Stéit mat geréngem Akommes treffen. Fir dass méi Leit zesummen an Autoe fueren, plädéiert den ACL fir steierlech Incitatiounen. Och missten a Betriber sougenannte Mobilitéits-Manager agestallt ginn, déi d'Personal iwwert déi adaptéiert Transportmëttelen informéiere géifen... dozou gehéiere Carsharing a Carpooling.

Eng weider Fuerderung, déi un de Nohaltegkeetsminister direkt gestallt gëtt, ass den Ausbau op 3 Bunnen vun der Areler Autobunn, well all Dag ëmmerhinn eng 43.000 belsch Frontalieren an d'Land kommen.

PDF: Schreiwes un de Minister Bausch

Da gëtt de Minister gefrot, firwat d'Contournementen vun Ettelbréck a Feelen nëmmen als Prioritéit 2 an d'geplangt Umgehung vun Dippech souguer nëmmen eng Prioritéit 3 duerstellt, a wat dat un Delaie fir d'Realisatioun vun dëse Chantieren heescht.

Iwwerhaapt freet den ACL, datt Stroosse-Schantercher besser koordinéiert sollte ginn, fir onnéideg Stauen z'evitéieren.

Esou Kniet entsti jo och ëmmer bei Accidenter, souguer deene mat just Blechschued: hei freet den ACL, datt missten Depanneusen fix laanscht d'Autobunnen stationéiert ginn, fir datt d'accidentéiert Autoe méi séier fort kommen - och misst d'Gestioun vun den Asätz op den Autobunnen no Accidenter zentraliséiert ginn.

Weider ass den Automobilclub géint e generaliséiert Erofsetze vun der Vitesslimitatioun vun aktuell 90 op 80 Stonnekilometer baussent den Uertschaften a setzt sech donieft an, datt bei engem Depassement vu bis zu 5 Stonnekilometer - am Fall wou een da geblëtzt gëtt - nëmme sollen 24 Euro Protokoll ze berappe sinn.

PDF: Pressecommuniqué mat de Revendicatioune vum ACL

Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.