Däitsch Kontroll-EntrepriseDekra wëll sech 2017 am Grand-Duché néierloossen

D'Multinationale, déi a méi wéi 50 Länner op der Welt präsent ass, wäert hei zu Land virun allem am "Contrôle technique" vun den Autoen aktiv ginn.

Dekra wëllt op Lëtzebuerg kommen / Reportage Eric Hamus



Dekra wëll sech 2017 am Grand-Duché néier loossen. Dat huet di däitsch Kontroll-Entreprise géintiwwer RTL confirméiert. An domadder der SNCT Konkurrenz maachen. Eng Iddi, déi net eréischt e puer Wochen al ass, wéi de Spriecher Wolfang Siegloch confirméiert: Zanter, dass de Marché fir de "Contrôle Technique" am Februar dëst Joer hei am Land opgaangen ass, hätt een sech domadder beschäftegt. Bei der Dekra hätt een sech dofir entscheet an eng entspriechend Demande beim Infrastruktur-Ministère agereecht.

Ee geneeën Datum steet nach net fest: Zil ass et awer nach 2017 mam "Contrôle technique" vun den éischten Autoen unzefänken. Fir de Moment schafft een drun, déi néideg Viraussetzunge fir eng Unerkennung vum Ministère ze schafen, dozou gehéiert och eng gëeegent Plaz am Land ze fannen.       

Ville Lëtzebuerger war di Firma bis ewell just als Logo um Formel-1-Champion Michael Schumacher senge Kape bekannt. Dobäi ass di däitsch Multinationale schonn zanter iwwer 90 Joer am Geschäft: D'Organisatioun gouf 1925 zu Berlin als "Deutscher-Kraftfahrzeug-Überwachungsverein" gegrënnt. An Tëschenzäit ass d'Dekra weltwäit eng vun de féierenden Expertenorganisatiounen a beschäftegt iwwer 38.000 Leit an iwwer 50 Länner. D'Dekra ass zoustänneg fir d'Sécherheet am Verkéier, Doheem an op der Aarbecht.  

Beim Infrastruktur-Ministère hat et en Dënschdeg geheescht, datt definitiv Interessi géing bestoen, d'Ouverture vun engem neien "Contrôle technique" wier awer net imminent. Am Ministère waarde se den Ament nach op déi néideg Pabeieren. Soulaang net alleguerten d'Dokumenter virleien, kann d'Demande och net gepréift ginn. Déi géifen eréischt no an no erakommen, sou d'Dany Frank.

D'Dany Frank



An dat op Demande fir alleguerten déi nei Kontrolleren. Och déi vun der SNCT. Déi mussen elo wéinst enger EU-Direktive eng Formatioun maache beim Educatiounsministère. Den neie Léierprogramm wier fäerdeg a kann am Januar ugoen.

D'Dany Frank (2)