US-President ganz iwwerzeegtTrump annoncéiert en neien Immigratiouns-Dekret

Den Donald Trump huet fir d'nächst Woch en neien Immigratiouns-Decret annoncéiert, dat gouf en Donneschden op enger Presskonferenz matgedeelt.

Den Areesverbuet fir Flüchtlingen a Leit aus 7 moslemesche Länner war jo vun de Geriichter gestoppt ginn. Den Trump wëll géint déi Decisioun net an Appell goen, mä also en neien Text presentéieren. Et wéilt een elo en zweet Dekret sur-mesure ausschaffen. Ëmmer mam Hannergrond fir d'USA ze schützen, sou den US-President.

No knapp 4 Wochen am Wäissen Haus huet den Donald Trump en Donneschden e ganz positive Bilan gezu vu senger Presidentschaft bis ewell – ganz am Géigesaz zu der zolitter Kritik, déi e soss vun alle Säite kritt.



Seng Regierung géif wéi eng gutt agestallte Maschinn lafen. Hien hätt all d'Wahlversprieche gehalen an ëmgesat. Wahrscheinlech hätt nach ni en amerikanesche President a sou kuerzer Zäit esou vill Succès gehat. Hie géif vun alle Säite positive Feedback kréien an um Aarbechtsmaart géif et eng Well vun Optimismus ginn.

Kritesch Medien, déi kruten en Donneschden alt nees „fake news“ ënnerstallt. Si wären onéierlech a géifen net am Sënn vum Interessi vum amerikanesche Vollek schaffen. Si géife bewosst net driwwer schreiwen, wat d'Regierung Trump an deene 4 Woche alles Formidabeles geleescht hätt.

RTL.lu: Eegeluef a vill Kritik un der Press, Stéchwuert "Fake News"

Iwwerdeems huet de fréiere Vize-Admirol Robert Harward d'Offer fir neie Sécherheetsberoder ze ginn, refuséiert.

Datt net all d'Posten vu senger Administratioun besat sinn, wier d'Schold vun den Demokraten, sou den Trump an enger Erklärung.

Protestaktioun "Day without immigrants"

Vu Fastfood-Châinen bis schick Restauranten, am ganze Land hunn Dosende Geschäfter aus Solidaritéit mat Immigranten hir Dieren zougelooss. Eleng zu Washington hu sech ronn 70 Restauranten un der Protestaktioun "Day without immigrants" bedeelegt.

D'Campagne soll weisen, wéi en Dag an den USA géif ausgesinn, wann Awanderer net géife schaffen goen an näischt consomméieren.