PakistanOp d'mannst 88 Doudeger bei Selbstmordattentat

Am Süde vu Pakistan sinn op d'mannst 88 Leit ëm d'Liewe komm bei engem presuméierten Attentat op e Schräin vu liberale Sufi-Moslemen.

E Selbstmordattentäter huet sech bei der Stad Sehwan an der Provënz Sindh an d'Luucht gesprengt. Den Autoritéiten no sollen op d'mannst 70 Mënschen ëmkomm sinn an iwwer 250 Leit goufen zum Deel schwéier verwonnt. Den IS huet d'Attentat an der Tëschenzäit revendiquéiert.

De ganz bekannte Schräin "Lal Shahbaz Qalandar" aus dem 13. Joerhonnert ass eng ganz beléiften Attraktioun, wou all Woch honnerte Gleeweger hi pilgeren. Den Donneschden ass den hellegen Dag vun de Gebieder, aus deem Grond ware besonnesch vill Mënschen op der Plaz.


Am Pakistan ginn ëmmer méi Attentater vun Islamisten duerchgefouert. Eleng e Mëttwoch hu sech 4 Selbstmordattentäter am Nordweste vum Land an d'Luucht gesprengt.

D'Autoritéiten am ganze Land si géint déi presuméiert Verantwortlech virgaangen. Engem Regierungsvertrieder no, goufen um Freideg de Moie fréi eng ganz Partie Persoune a Razzien festgeholl.

Donieft wiere bei Asätz an der Provënz Sindh an am Nordweste vum Land 100 Terroristen ëmbruecht ginn. Engem Porte-Parole vun der Arméi no, wier d'Grenz  fir an den Afghanistan zougemaach ginn.