Terror op de Champs-ÉlyséesEe Polizist dout, 3 Blesséierter, Täter och erschoss

Frankräich gouf nees d'Zil vun enger terroristescher Attack. Während dem Attentat op de Champs-Elysée en Donneschdeg den Owend ass ee Polizist ëmkomm.

Terror, mëtten op de Champs-Elysées. (21.04.2017)
E Polizist stierft. Den Attentäter, en 39 Joer ale Fransous war den Autoritéite gutt bekannt. De Karim Cheurif war awer net klasséiert, als radikaliséiert.


No der Terrorattack en Donneschdeg zu Paräis goufen e Freideg dräi Leit aus dem Entourage vum Attentäter vun der Police matgeholl a gi gehéiert.
Den Attentäter gouf erschoss. D'Enquêteuren hunn nach en Donneschdeg den Owend am Departement Seine-et-Marne d'Wunneng vum Mann duerchsicht. Hie war der Police bekannt. De 39 Joer ale Fransous gouf schonn 2005 wéinst zwou Attacke mat Waffen op zwee Polizisten zu enger Prisongsstrof vu fënnef Joer veruerteelt. Dräi weider Persoune goufe blesséiert. Am spéiden Owend gouf Dot vun der Dschihadistenmiliz vum sougenannten Islamesche Staat revendiquéiert. 

Den Täter hat geziilt op Polizisten an hir Autoe geschoss, éier hie selwer vun engem Beamten erschoss gouf. Ënnert deenen dräi blesséierte Persounen ass nieft zwee Polizisten och eng auslännesch Staatsbiergerin. Si soll duerch eng Kugel liicht blesséiert gi sinn. Iwwert hir Nationalitéit ass nach näischt gewosst. Am Laf vum Owend gouf iwwerdeems d'Nouvelle dementéiert, dass een zweete Polizist ëm d'Liewe komm wier. Zwee Beamte goufe vun de Kugele getraff, ee vun hinnen uerg blesséiert, den anere méi liicht.

Band: François Hollande



Landeswäit gouf um Freideg un de Polizist geduecht, dee während der Attack ëm d'Liewe koum. Och de President Hollande huet säi Respekt fir d'Polizisten an de Militär ausgedréckt, déi all Dag hirer geféierlecher Aarbecht noginn, fir d'Sécherheet vum Land ze garantéieren.


Extrait François Hollande



De Procureur vu Paräis François Molins ass en Donneschdeg den Owend spéit virun der Presse op den Oflaf vun de Faiten an déi nächst Schrëtt agaangen.

Extrait François Molins



Wéi et vun der Anti-Terror-Cellule heescht, hätt den Attentäter scho virun der Dot seng Intentioun däitlech gemaach, dass hie Poliziste wéilt ëmbréngen.

Hie war en Donneschdeg den Owend kuerz virun 21 Auer op de Champs-Elysée mat engem Auto stoe bliwwen an ass eraus geklommen. Hien huet duerno mat enger automatescher Waff op de Policeauto geschoss. Dobäi koum wéi gesot ee Beamten ëm d'Liewen. Duerno ass den Attentäter fortgelaf an huet probéiert, nach aner Polizisten ze treffen.

D'Champs Elysée goufen doropshi ganz gespaart an d'Populatioun opgeruff, dës Plaz ze evitéieren. De Proprietär vun engem Restaurant sot der Noriichtenagence AFP, dass een intensive Schosswiessel ze héiere gewiescht wier, hien hätt seng Clienten doropshin am Keller verstoppt.

De franséische President François Hollande huet iwwerdeems verséchert, dass alles gemaach gëtt, fir dass d'Wahlen a Frankräich ouni Virfäll kënnen iwwert d'Bühn goen. Den éischten Tour vun der Presidentielle ass jo dëse Sonndeg.

D'Attack ass geschitt, während déi eelef Presidentschaftskandidate grad op France 2 interviewt goufen. Déi rietspopulistesch Kandidatin Marine Le Pen, de François Fillon vun der Droite an de Partei-Onofhängegen Emmanuel Macron hunn hir fir e Freideg geplangte Wahlkampfoptrëtter ofgesot.