Attack op BVB-BusPresuméierten Täter festgeholl. Motiv: Aktiëspekulatioun

Nom Sprengstoffattentat op de Mannschaftsbus vu Borussia Dortmund huet d'Police eng suspekt Persoun festgeholl.

Zanter dem 13. Abrëll war no engem russesch-däitsche Staatsbierger gesicht ginn. Den 28 Joer ale Sergej W. soll um Freideg de Moie fréi während engem Policeasaz a Baden-Württemberg festgeholl gi sinn.

Och zum Motiv konnten d'Ermëttler mëttlerweil méi soen. Um Dag vum Uschlag huet de jonke Mann 15.000 Verkafsoptiounen op d'Aktie vum Veräin kaf an dorop spekuléiert, dat den Aktiëcours vum BVB géing falen. Fir sécher ze goen datt dat och géing geschéien, hat de Sergej W. sech schonn den 9. Abrëll am Hotel "L'Arrivée" aquartéiert, wou d'Equipe viru Matcher och ënnerkënnt a vu wou hien déi spéider Plaz vum Verbrieche konnt am A behalen.

Däitsche Medien no wier de Mann zanter enger Woch observéiert ginn. Säin Zëmmer hat eng direkt Vue op d'Plaz wou d'Bomm detonéiert ass. D'Police geet och dovunner aus, datt hie se vun do aus gezünt huet.

Wier dem Mann säi Plang opgaangen, wär säi Gewënn "e Villfachst vu sengem Asaz" gewiescht, esou d'Ermëttler. Och d'Attack u sech hätt villméi schlëmm ausgoe kennen, wann de mëttlere vun den dräi Zünder net ze héich ubruecht gi wier.

Wéi et ausgesäit, haten d'Jonge vum BVB nach eng Kéier Gléck. Dat selwecht kann allerdéngs net vum Sergej W. gesot ginn. Him gëtt 20-fache versichte Mord virgeheit.

Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.