ParäisPolice-Camionnette gerammt, Waffen a Gasfläschen am Auto

Opreegung e Méindeg de Mëtteg op de Champs-Elysées, wou e radikalen Islamist et op Polizisten ofgesinn hat. Hie sollt seng eegen Aktioun net iwwerliewen.

Am Häerz vu Paräis, op de Champs-Élysées, hat e Méindeg am Nomëtteg géint 16 Auer en Auto eng Police-Camionnette gerammt. Den Auto huet doropshi Feier gefaangen.

E massive Police-Dispositif war séier op der Plaz, well onkloer war, ob et sech ëm en Accident oder e probéierten Uschlag géif handelen.

Kuerz drop koum d'Info, datt et keng Blesséierter ënnert de Polizisten oder bei de Leit op der Strooss gouf.

Weider Informatiounen op 5minutes.rtl.lu.



De Chauffeur vum Auto gouf par contre uerg verwonnt, e sollt seng schro Blessuren net iwwerliewen. Géint 17.30 Auer gouf säin Doud matgedeelt.



De franséischen Anti-Terror-Parquet gouf dann och mat enger Enquête saiséiert.

Et misst een, sou housch et relativ séier vun den Autoritéiten, vun enger geziilter Aktioun ausgoen.

Am Auto vum Täter goufen nämlech eng Kalaschnikow, Pistoulen a Gasfläsche fonnt.



Um Méindeg den Owend war dann och kloer, datt op de Champs-Élysées eng Attack probéiert gouf, déi awer wuel net esou verlaf ass, wéi et geplangt war.

De Mann, esou franséisch Medien, wier "fiché S" gewiescht - "S" steet hei fir "sûreté de l'État".

Den Täter hat 31 Joer, e wier zanter 2015 police-bekannt gewiescht an et géif sech dobäi ëm e radikalen a militanten Islamist handelen. Trotzdeem soll de Mann gläichzäiteg och e Permis fir direkt e puer Waffe gehat hunn, dat mellt de franséischen Noriichtesender BFMTV.

4 Familljemembere vum radikaliséierten Islamist sëtzen donieft an Untersuchungshaft. Et handelt sech ëm de Papp, de Brudder, d'Ex-Fra an d'Schwéiesch vun dem 31 Joer ale Mann. Si sëtzen zanter e Méindeg am Garde à vue, heescht et aus Justizkreesser.










Net deen éischte Virfall ...

Eréischt virun zwee Méint, den 20. Abrëll, hat op de Champs-Élysées e Mann op Poliziste geschoss an ee Beamten erschoss, éier e selwer erschoss gouf. Den IS hat d'Dot revendiquéiert.

Vun engem islamisteschen Hannergrond ginn d'Leit och bei enger Attack op Poliziste virun der Kathedral Notre-Dame zu Paräis aus. Viru knapp zwou Wochen ass do e Mann mat engem Hummer op Poliziste lassgaangen. Dobäi huet e geruff: "Dat hei ass fir Syrien!" De Mann gouf vun der Police ausser Gefecht gesat.

Zanter Ufank 2015 sinn a Frankräich bei enger Serie vun islamisteschen Attacken 239 Mënschen ëmkomm. Ëmmer nees goufe Polizisten oder Zaldoten ugegraff.