Trump kritiséiert NordkoreaUS-Student Otto Warmbier stierft no Prisong an Nordkorea

17 Méint laang war den Otto Warmbier an Nordkorea inhaftéiert. Virun e puer Deeg war e fräigelooss ginn, ma e war deen Ament schonn am Koma.

Dës Foto vum Otto Warmbier hat déi staatlech nordkoreanesch Noriichtenagence den 1. Mäerz 2016 verëffentlecht.
Elo ass den 22 Joer alen amerikanesche Student dout.

Dat huet seng Famill verschiddenen US-Medie confirméiert.

Den Otto Warmbier, Student op der Uni vu Virginia, war als Tourist an Nordkorea a war do 2016 verhaft ginn, well en e Propagandaplakat mathuele wollt. Doropshi gouf hien zu 15 Joer Zwangsaarbecht veruerteelt.

An engem gesondheetlech ganz schlechten Zoustand war hie virun e puer Deeg nees an Amerika ukomm. Aus "humanitäre Grënn" war e fräigelooss ginn.

E war deen Ament am Koma - firwat, dat ass net genee gewosst; amerikanesch Dokteren hunn der offizieller nordkoreanescher Versioun awer widdersprach. Esou hu si keng Indicë fir Botulismus (Vergëftung) fonnt, ma d'Schied um Gehir wiere wuel op en Häerzstëllstand zeréckzeféieren.

Während dem Prozess zu Pyongyang.


Den amerikanesche President huet Nordkorea nom Doud vum amerikanesche Student schaarf kritiséiert. D'Regierung zu Pjöngjang wier ee brutale Regime, sou den Donald Trump. Et wiere schlëmm Saache geschitt. Ëmmerhi wier et awer nach gelongen, dee jonke Mann heem bei seng Elteren ze huelen. Kuerz virdrun hat dem Otto Warmbier seng Famill bekannt ginn, dass hien an engem Spidol an senger Heemechtsstad Cincinnati gestuerwen ass.