VIDEO: Auto an Demonstrante geranntTrump geréit an d'Kritik, Täter war en Neonazi-Sympathisant

Et sinn dramatesch Zeenen, déi sech e Samschdeg an der Stad Charlottesville ofgespillt hunn. Iwwerdeems geréit den US-President ëmmer méi an d'Kritik.

Gewalteskalatioun zu Charlottesville an den USA (13.08.2017)
1 Fra an iwwer 30 Blesséierter bei Geigenmanif zu rietsradikaler Demonstratioun am Bundesstaat Virgina.

Ugefang huet dat Ganzt mat enger Demonstratioun vu Rietsextremen, opgeruff hat ënnert anerem och de Ku Klux Klan. Als Géigereaktioun op déi Manifestatioun, sinn honnerte Géigendemonstranten, dorënner d'Majoritéit Lénker op d'Strooss gaangen. Chaos ass ausgebrach an d'Leit openee lassgaangen. Ënnert anerem hunn d'Manifestante mat Pefferspray hantéiert a Saachen duerch d'Loft gehait. Doropshin gouf den Ausnamezoustand ausgeruff.

An deem ganzen Duerchaneen ass dunn een Auto an ee Grupp Manifestanten gerannt, déi géint déi Rietsextrem a Rassisten demonstréiert hunn. Eng Persoun huet d'Attack net iwwerlieft, op d'mannst 19 solle blesséiert gi sinn. Op engem Video vun engem Zeien gesäit ee wéi de Chauffeur, nodeems en an d'Leit gerannt ass, nees mat héijer Vitesse de Réckgang amécht. Den 20 Joer ale presuméierten Täter gouf no der Dot festgeholl.

Elo huet den FBI d'Enquête an dësem Fall iwwerholl.

© afp


No der Dot an der Manifestatioun vu Rietsen, huet den amerikanesche Justizminister d'Akten condamnéiert. D'Intoleranz, déi sech e Samschdeg manifestéiert hätt, géif déi fundamental amerikanesch Wäerter verroden a kéint net toleréiert ginn. D'Gewalt zu Charlottesville géif d'Häerz vu Recht an Uerdnung an Amerika treffen.

Iwwerdeems gouf et Kritik um President Donald Trump, och aus den eegene Reien. Hien hat no der Dot, d'Gewalt veruerteelt, sech awer an den Ae vu senge Kritiker net genuch vun de Rietsextremen distanzéiert, déi d'Manifestatioun lancéiert haten. De Buergermeeschter vun der Unisstad am Virginia, Michael Signer, huet de President wéinst deem senger Walkampf-Rhetorik mat verantwortlech gemaach, fir d'Eskalatioun e Samschdeg.

Während de brutalen Ausernanersetzunge goufen, nieft de Blesséierten vun der Autosattack, nach weider 19 Leit verwonnt. Verschiddener schro. 2 Polizisten koumen ëm d'Liewen, wéi hiren Helikopter bei Charlottesville erofgefall ass. Och hei gouf eng Enquête opgemaach, well d'Hannergrënn net gewosst sinn.

Den Automobilist vun 20 Joer soll e Méindeg eng éischte Kéier viru Geriicht kommen. Him gëtt Doutschlag, Kierperverletzung a Fahrerflucht reprochéiert. Antëscht gëtt et ëmmer méi Indicen, datt de jonke Mann aus dem Staat Ohio en Neonazi-Sympathisant war. Hien wier spéitstens am Lycée vum Adolf Hitler faszinéiert gewiescht, heescht et.

Den Donald Trump hat nom Tëschefall zwar Haass a Gewalt am allgemenge veruerteelt, huet dobäi awer bewosst Rassisten a Rietsextremer net beim Numm genannt, mä vu Gewalt vu "ville Säite" geschwat.

Virun deem Hannergrond sinn e Sonndeg a villen amerikanesche Stied Leit géint Rassismus op d'Strooss gaang.

Antëscht huet sech den amerikanesche Vizepresident zu Wuert gemellt. De Mike Pence huet op enger Pressekonferenz kloer gemaach, d'USA hätte keng Toleranz fir Haass a Gewalt vun Neonazien oder dem Ku Kux Klan.

Den Donald Trump sengersäits soll, wéi et heescht, um Méindeg seng Vakanz am eegene Golfclub fir eng "wichteg Matdeelung" ënnerbriechen. Dobäi soll et awer net ëm d'Krawallen zu Charlottesville goen, mä ëm déi chinesesch Handelspraktiken.