BundestagswahlenE puer Gewënner an e puer bluddeg Nuesen

CDU/CSU gewannen trotz Verloschter d'Bundestagswahle virun der SPD. D'AfD gëtt 3.-stäerkste Partei. D'SPD huet schonn ugekënnegt an d'Oppositioun ze goen.

Däitschland huet also gewielt: D'Koalitiounsparteie vu bis elo, CDU/CSU an SPD, hunn no der Bundestagswahl hefteg Verloschter mussen astiechen. Nodeems an der Nuecht op e Méindeg all 299 Wahlkreesser ausgezielt waren, falen d'CDU an d'CSU zesummen op 33% erof, dat ass ee Minus vun 8,5 Prozentpunkten am Verglach mat 2013. D'Sozialdemokraten kommen op 20,5%, wat ee Minus vu 5,2 Prozentpunkten ass. Fir d'Sozialdemokraten dat bis elo schlechtst Resultat bei enger Bundestagswahl. Mat 12,6% gëtt déi rietspopulistesch AfD drëttstäerkste Kraaft am neie Bundestag.

Zu Berlin kommen um Méindeg de Moien d'Spëtzegremie vun de Parteie beieneen, fir d'Wahlresultat ze analyséieren. No deene massive Verloschter zeechent sech eng Koalitioun vun Unioun, FDP an déi Gréng of.

Um Dag no de Wahlen huet den CSU-Chef Horst Seehofer déi traditionell Fraktiounsgemeinschaft mat der CDU a Fro gestallt. Et wéilt een elo mol oploossen, ob d'CDU an d'CSU och am neie Bundestag nach eng Fraktioun géinge forméieren. Den Horst Seehofer wëll d'CSU-Spëtzt no engem Debat iwwert den zukünftegen Ëmgang mat der Schwësterpartei ofstëmme loossen. Dës Fro schéngt awer séier vum Dësch gewiescht ze sinn, well scho kuerz drop hunn d'Noriichtenagencë gemellt, et géif bei der CDU/CSU-Fraktioun bleiwen.

Gréissten Oppositiounspartei gëtt d'AfD awer net. D'SPD huet nämlech um Sonndeg den Owend, kuerz nodeems d'Wahlresultat bekannt war, annoncéiert an d'Oppositioun ze goen.

D'FDP huet et iwwerdeems nees no véier Joer Abstentioun an de Bundestag gepackt. Déi nei Fraktioun kënnt um Méindeg de Mëtteg fir hir éischt Sëtzung beieneen. Déi Liberal ënnert hirem neie Chef Christian Lindner koumen op 10,7% vun de Stëmmen a ginn domat véiert stäerkste Kraaft am Bundestag. Déi Lénk kommen op 9,2% an déi Gréng op 8,9%.
D'Wahlparticipatioun louch bei 76,2%, 2013 bei 71,5%.

CDU an CSU hätte sech ee bessert Resultat erhofft, sou d'Bundeskanzlerin Angela Merkel e Sonndeg den Owend an enger éischter Reaktioun. Eent wier awer kloer, et hätt een d'Mandat krut eng Regierung ze forméieren.

Angela Merkel net enttäuscht



Op d'Unioun kommen elo schwiereg Verhandlungen mat deene Gréngen an der FDP duer. D'CDU an d'CSU stellen an Zukunft 246 Deputéiert, d'SPD kënnt op 153, d'AfD als drëttstäerkst kommen op 94 Mandater, d'FDP ass mat 80 Deputéiert vertrueden, déi Lénk mat 69 an déi Gréng krute 67 Mandater am neie Bundestag, dee mat am Ganzen 709 Deputéiert sou grouss ass wéi nach ni (dat wéinst "Iwwerhangmandater", well am Fong ass de Bundestag manner grouss).

Resultater nodeems déi 299 Wahllokaler ausgezielt waren

  • CDU/CSU: 33,0 (-8,4)
  • SPD: 20,5 (-5,2)
  • AfD: 12,6 (+7,9)
  • FDP: 10,7 (+5,9)
  • Linke: 9,2 (+0,6)
  • Bündnis 90/Grüne: 8,9 (+0,5)

Dëst féiert zu folgender Sëtzverdeelung:

  • CDU/CSU: 246
  • SPD: 153
  • AfD: 94
  • FDP: 80
  • Linke: 69
  • Bündnis 90/Grüne: 67

© AFP

Reaktiounen a Resultater

SPD als "Oppositounsführer"?



Kuerz no de éischte Prognosen huet d'SPD annoncéiert, datt si géif an d'Oppositioun goen. Domadder wiere si "Oppositiounsführer" virun der AfD an hätt esou och d'"Rederecht", also fir direkt no der Kanzlerin ze schwätzen. Géife si mat der Unioun an d'Koalitioun goen, géif dës Roll un d'AfD falen.

A senger Ried um Sonndeg den Owend kuerz no 18.30 Auer huet de Martin Schulz confirméiert, datt een net méi mat der CDU/CSU géif an eng Koalitioun goen. Grond wier, datt déi aktuell Regierung zesumme mat der Unioun vill Stëmme verluer huet. De Martin Schulz wier ugetrueden, fir d'Kanzlerin ofzeléisen, dowéinst war hien och ni Member vun der grousser Koalitioun.

Schwaarz-Gréng-Giel als Koalitioun?

Ouni d'SPD wier eng Jamaika-Koalitioun, also Schwaarz, Gréng, Giel déi eenzeg Alternativ, ouni mat der AfD eng Regierung ze bilden. Obwuel d'SPD zweetstäerkste Partei ginn ass, hu si vill Stëmme bei dëser Wahl verluer.

"Die Grünen" mat guddem Resultat




Op 8,9% kommen "Die Grünen". Dat hate sech déi mannste Leit erwaart, grad well si an allen Ëmfroen no net esou héich koumen an zum Deel esouguer déi 5 Prozent "Hürde", déi ee brauch, fir an de Bundestag ze kommen, net erreecht hätten. Hiert d'Resultat ass esouguer besser wéi nach viru 4 Joer.

CDU/CSU stäerkste Kraaft, ma mat vill manner Stëmmen



Grad d'CSU huet en historescht d'Déif erreecht, dat mat 38,8 Prozent a Bayern, viru véier Joer koume si nach op 49,3 Prozent. Dat ass dat schlechste Resultat zanter 1949 fir déi Bayresch Partei. De selwechten Trend gouf et awer och am ganze Land, wou d'Schwësterpartei CDU och iwwerall Stëmme verluer huet. Zesummen huet ee knapp 8 Prozent manner Stëmmen, wéi et nach bei de leschte Wahlen de Fall war.

FDP zeréck am Bundestag



Bei de leschte Wahlen hat d'FDP déi 5 Prozent net erreecht a war esou net an de Bundestag gezunn. Nach viru knapp 2 Méint war d'Zil vun de Liberalen, fir eppes klenges iwwer 5 Prozent ze kréien. Elo kann ee feieren, well d'Partei mat iwwer 10 Prozent hir d'Zil verduebelt huet an domadder ass een esouguer zu engem méigleche Koalitiounspartner ginn.



"Die Linke" net méi drëttstäerkste Kraaft



Mat iwwer 9 Prozent bleiwen "Die Linke" am Parlament. Si hunn esouguer e puer Stëmmen dobäi gewonnen, goufen awer vun der AFD als drëttstäerkste Partei am Bundestag ofgeléist.

AfD mat engem Plus vu 7,9 Prozent



D'Alternativ fir Däitschland ass drëttstäerkste Kraaft am Bundestag. Mat iwwer 12,5 Prozent krute si méi Stëmmen, wéi vill anerer Partei sech et gewënscht hunn, ma si wäerte fir keng aner Partei als Koalitiounspartner a Fro kommen an no der Annonce vun der SPD och net als "Oppositionsführer" an de Bundestag anzéien.



Déi franséisch Rietspopulistin Marine Le Pen huet der Partei fir hiert historescht Wahlresultat gratuléiert. Op Twitter huet si geschriwwen, dass dëst Resultat géif drop hindeiten, dass déi europäesch Vëlker am Gaange si waakreg ze ginn. Och d'Rietspopulisten an Éisträich gesi sech eegenen Aussoen no duerch dëst Wahlresultat an hirer Flüchtlingspolitik confirméiert.



Jüddesch Organisatioune sinn entsat driwwer, dass d'AfD et an de Bundestag gepackt huet. Am Parlament wier elo eng Partei vertrueden, déi rietsextrem Ideologien an hire Reien toleréiert a géint Minoritéiten ophetzt, sou den Zentralrot vun de Judden an Däitschland. De Jüddesche Weltkongress huet dat staarkt Resultat vun der AfD als "degoûtant" bezeechent.

LINK: Reaktiounen aus Lëtzebuerg vu Bettel, Asselborn a Spautz.

Invité vun der Redaktioun: Dr. Anna-Lena Högenauer iwwer d'Wahlen an Däitschland

"Ganz Berlin hasst die AfD": Protester zu Berlin

Knapp waren d'Resultater vun de Wahle bekannt an de Schock nach net ganz verdaut, du sinn schonn déi éischt Demonstranten duerch d'Stroossen vun der däitscher Haaptstad gezunn an hu sech virun dem Club versammelt an dem déi rietspopulistesch AfD e Sonndeg den Owend hire Succès gefeiert huet. D'Annick Goerens war fir eis zu Berlin op der Plaz.

AfD-Demonstratioun zu Berlin / Reportage Annick Goerens



"Ganz Berlin hasst die AfD", dat war nach den feinste Protest-Slogan deen e Sonndeg den Owend e puer honnert Leit bis an d'Nuecht eran gejaut hunn. "Eure Party ist Scheiße", "es gibt kein Recht auf Nazi-Propaganda",  "Nazi-Sau" an "Haut ab" huet een och ëmmer nees duerch d'Stroossen beim Alexanderplatz halen héieren, wou d'Partei fir hir Wahlparty beienee war. D'Stëmmung war haart a gereizt. Si hu mat haardem Päife probéiert d'Party ze stéieren a gefuerdert, dass d'AfD sech sollt ewech maachen.



Eng honnert Policebeamte waren am Asaz, fir d'Manifestanten vum Club ze trennen an deem d'AfD gefeiert huet. Plazeweis wiere Fläschen a Steng  geheit ginn, mellt d'Police, ma am groussen Ganzen ass et relativ roueg bliwwen, ofgesinn natierlech vum Gejäiz. D'Parteimemberen a Frënn vun der AfD konnte vum Balkon op d'Demonstratioun erofkucken, sou och de Georg Pazderski, Fraktiounschef vun der AfD am Berliner Landesparlament. Hie fënnt Manifestatiounen, wa se dann ugemellt sinn, net schlëmm, ma hält se an dësem Fall  fir iwwerflësseg.

Fir eng spontan Demo sinn och honnerte vu Leit zu Leipzig op d'Stroosse gaangen. Ähnlech Zeene gouf et zu Köln, Hamburg a Frankfurt. Am Internet hu ganz vill Leit op Twitter hirer Roserei fräie doriwwer gelooss, dass d'AfD drëttstäerkste Kraaft gouf.

De Bols virun den éischten Héichrechnungen

D'Kollege vun der Tëlee waren zu Berlin Mitte, an hunn do bei de Leit nogefrot, wat si sech vun de Wahlen erwaarden.

Bundestagswahlen (24.09.2017)
Mir hunn de Bolz zu Berlin gefillt, kuerz virun den éischten Héichrechnungen.


Een Drëttel iwwer 60 Joer
D'Annick Goerens iwwer d'Stëmmung zu Berlin



D'Journalistin Annick Goerens war fir den RTL am Wahlbezierk Berlin Mitte ënnerwee a war e Sonndeg de Moien am Wahllokal 207, fir de Bols bei den däitsche Bierger ze fillen. Schonn do ass et him opgefall, wéi vill eeler Leit de Wee an d'Wahllokal fannen. An effektiv, een Drëttel vun de wahlberechtegte Bierger ass iwwer 60 Joer al a just ee vu 7 ass ënner 30. Däitschland huet am Duerchschnëtt eng vun den eelste Populatiounen op der Welt, just Japan a Monaco sinn "méi al".

D'Leit goufen an de leschten Deeg immens vill, vun alle Säiten, mobiliséiert, fir wielen ze goen. Och dat huet een de Moien gespuert. Quasi all Wieler huet eis confirméiert, dass e just kënnt fir dass seng Stëmm net "verluer" geet.

Fënnef Lëtzebuerger zu Berlin: Vun de Bundestagswahlen héiert ee bei de Leit net vill

DE LIVESTREAM vun N-TV


Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.