No 5 Deeg am ÄisDäitschen Alpinist aus Fielsspléck an Éisterräich gerett

Bei enger spektakulärer Rettungsaktioun gouf en däitschen Alpinist no 5 Deeg aus enger Fielsspléck an den éisträicheschen Alpen gerett.

En Alpinist aus Duisburg konnt no enger Chutte an eng Fielsspléck op 2050 Meter Héicht no 5 laangen Deeg a sengem äisege Prisong gebuerge ginn. D'Rettungsequipe huet de 45 Joer ale Mann an engem 30 Meter déiwe Lach entdeckt. Säi Papp hat hien de 6. November als vermësst gemellt.

Den Alpinist hat de 4. November en Tour an den éisträicheschen Alpen annoncéiert, ass awer net méi erëm komm. Hie war duerch eng Schnéiplack gebrach an, an eng déif Spléck an de Fielse gefall.

Ganz dramatesch war, dass de Mann während 4 Deeg verzweiwelt probéiert huet per Handy ëm Hëllef ze ruffen, deen hien ëmmer nees ausgemaach huet, fir genuch Akku ze behalen. Den 9. November, also en Donneschdeg den Owend ass et him gelongen d'Noutruffzentral ze kontaktéieren. En éischten Appel war um 21 Auer, awer wéinst schlechtem Reseau wier deen direkt ënnerbrach ginn. Weider Appeller sinn ëm 23 Auer duerchgaang, awer vun all Kéier just e puer Sekonnen. Et hätt een eng Persoun ganz schwéier otmen héieren, sou déi zoustänneg Police. Et gouf direkt reagéiert.



Gewosst war just, dass de Vermëssten am Dachstein-Gebitt ënnerwee war a säin zougeschneiten Auto gouf op engem Parking beim Gosausee lokaliséiert. D'Rettungsaktioun gouf nach an der Nuecht trotz Däischtert a Lawinegefor, no annerhallwem Meter Neischnéi, lancéiert, awer ouni grouss Aussiichten op Succès.

Och an der Nuecht huet de Verongléckten probéiert bei der Police duerchzekommen an e Beamten huet sech per SMS zeréckgemellt. Dem Mann ass et duerno nach gelongen seng GPS-Daten z'iwwermëttelen, anerefalls hätt een hie wuel net fonnt. Ëmmerhin waren do schonn iwwer 25 Leit am Gaangen no Mann ze sichen.

Um 4 Auer gouf hie schlussendlech entdeckt, staark ënnerkillt, mat enger ausgekugelter Schëller an engem gebrachene Fouss. Hie koum direkt mam Helikopter an d'Spidol. Net nëmmen den Handy, ma och säi komplett Equipement hätten him d'Liewe gerett, sot zum Schluss e Porte-Parole vu der éisträichescher Police.