D'Ried vum Grand-DucVerhandlungen op Ministerniveau op der Cop23 zu Bonn

Suite vun der Weltklimakonferenz zu Bonn mat de Verhandlungen op Ministerniveau. Um zweetleschten Dag sinn d'Gespréicher an hirer decisiver Phase ukomm.

Lors de la cérémonie d'ouverture officielle de la COP23 , S.A.R. le Grand-Duc est entouré, de g. à dr., par des ministres Pierre Gramegna (L), Eric Wiebes (NL) et Carole Dieschbourg (L).© Cour Grand-Ducale / Twitter
Een éischt Zil huet huet d'Konferenz schonn areecht. No annerhallwer Woch läit en éischten Text fir ee Reegelwierk um Dësch, mat deem de Paräiser Klimaaccord soll ëmgesat ginn. Definitiv ofgeseent ginn, soll dëst Reegelwierk dann d'nächst Joer op der Cop24 a Polen. Eent vun den Ziler vun der Klimakonferenz zu Bonn war scho méiglechst konkret Proposen auszeschaffen.

Op Lëtzebuerger Säit ass nieft dem Grand-Duc Henri an der Ëmweltministesch Carole Dieschbourg vun e Mëttwoch un dann och de Finanzminister Pierre Gramegna op der Cop23 dobäi. Hie participéiert un direkt e puer Konferenzen, déi ganz am Zeeche sti vun de sougenannte grénge Finanzen. De Pierre Gramegna schwätzt an dem Kontext och iwwert de Rôle vun der Lëtzebuerger Finanzplaz, wat de Beräich vun de "Green Finance" betrëfft.

Lëtzebuerg iwwerhëlt seng Responsabilitéiten

E Mëttwoch huet sech de Grand-Duc Henri un d'Konferenz adresséiert. Hie sot a senger Ried, dass hien en duebele Message hätt. De Message vum Handelen an de Message vun der Solidaritéit. Et wier wichteg zu Bonn een Accord ze fannen, wat ee Reegelwierk betrëfft en Vue vun der nächster Weltklimakonferenz 2018 zu Katowice. D'Cop23 misst et erméiglechen, dass ënnert de beschte Konditiounen een Dialog ka gefouert ginn. Et géif nämlech keng Alternativ ginn, huet de Staatschef betount. Wann een d'Sécherheet vun de Bierger wéilt assuréieren a verhënneren, dass Leit duerch de Klimawandel musse flüchten, missten d'Ambitioune ganz héich sinn. Weider huet de Grand-Duc Henri betount, dass Lëtzebuerg seng Responsabilitéiten iwwerhëlt.

De Grand-Duc Henri (Extrait 7h)



D'Zil wier et, am Laf vun den nächste 15 Joer, eng Reduktioun vun den CO2-Emissiounen ëm d'Halschent pro Awunner ze areechen. Et géif een dësen Defis ugoen am Respekt vun eisen Engagementer géintiwwer de Klimaziler awer och fir eis Economie ze diversifiéieren, nei Aarbechtsplazen ze schafen an d'Liewensqualitéit ze verbesseren.

De Grand-Duc ass och op dee finanziellen Engagement vun eisem Land agaangen. Sou deblockéiert de Grand-Duché fir déi nächst 7 Joer net manner wéi 120 Milliounen Euro fir déi äermsten Länner op der Welt. Weider huet hien d'Finanzplaz Lëtzebuerg an d'Spill bruecht, an déi domat verbonnen nohalteg Finanzpolitik. Hien huet an dem Kontext verschidde konkret Initiativen zitéiert an ënnert anerem de "Luxembourg Green Exchange" ervirgehuewen.

Elo wier d'Zäit komm vun der Mobilisatioun a fir konkret ze ginn, sou de Lëtzebuerger Staatschef. Hien huet een Appell un eis all gemaach, un international Organisatiounen, déi eenzel Länner, de privat Secteur an d'Zivilgesellschaft hir Responsabilitéiten ze iwwerhuelen an sech ze mobiliséieren. Et wier eng Course géint d'Zäit. Et misst endlech zu engem Mentalitéitswiessel kommen, mir missten eis Liewensgewunnechten änneren. Jidderee vun eis misst säi klenge Geste dozou bäidroen, fir déi zukünfteg Generatiounen, sou nach de Grand-Duc Henri.

Och zu Bonn vertruede sinn déi däitsch Kanzlerin Angela Merkel an de franséische President Emmanuel Macron. Hiert Zil ass, dem Kampf géint de Klimawandel een neien Elan ze ginn. Si hunn e Mëttwoch de Mëtteg den Optakt vun enger ganzer Serie vun Discourse gemaach. Iwwer 150 Staats- a Regierungscheffe souwéi Ministeren trieden déi nächst 2 Deeg iwwer un d'Riednerpult vun der Cop23.

Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.