Reaktiounen aus LëtzebuergMerkel géif bei Neiwahlen och nach eng Kéier kandidéieren

An der Nuecht vun e Sonndeg op e Méindeg war et d'Nouvelle, datt d'FDP d'Gespréicher ofgebrach huet an et domat keng "Jamaika"-Koalitioun wäert ginn.

Däitschland: "Jamaika"-Koalitioun geplatzt (20.11.2017)
An der Nuecht vun e Sonndeg op e Méindeg war et d'Nouvelle, datt d'FDP d'Gespréicher ofgebrach huet an et domat keng "Jamaika"-Koalitioun wäert ginn.

Nodeem d'FDP an Däitschland d'Sondéierungsgespréicher fir eng Jamaika-Koalitioun mat der Unioun an de Grénge platze gedoen huet, war d'Kanzlerin Merkel beim Bundespresident Steinmeier. De Frank-Walter Steinmeier wëll Neiwahlen an Däitschland verhënneren. Einfach ass dës Missioun allerdéngs net.

En Dënschdeg de Mëtteg um 16 Auer empfänkt hien fir d'éischt den FDP-President Christian Lindner. Geplangt sollen och nach Gespréicher mat de Presidente vun déi Gréng sinn an dem SPD-Chef Martin Schulz. Sollt et keng Suite vun de Jamaika-Sondéierungsgespréicher ginn, dreeën Däitschland Neiwahlen.

D'SPD huet nach eemol kloer an däitlech Nee gesot, wat eng Neioplo vun der Grousser Koalitioun ugeet. Op der ARD sot de Martin Schulz e Méindeg den Owend, dass hie vun Neiwahlen ausgeet.
An der Unioun selwer gëtt et nach Hoffnung, dass Neiwahlen kënnen evitéiert ginn. Den CSU-Generalsekretär Andreas Scheuer sot, dass et net gutt fir d'Land wier, dass d'SDP sech komplett verschléisst fir nach eemol mateneen ze schwätzen. Éier Neiwahlen decidéiert ginn, missten all Méiglechkeeten consideréiert ginn, déi zur Verfügung stinn.

D'Angela Merkel
wëll, am Fall vun Neiwahlen, nees als Kanzlerkandidatin untrieden. Si hätt hire Wieler virun der Bundestagswahl versprach, 4 weider Joer op hirem Posten ze bleiwen, sot si e Méindeg an enger éischter Reaktioun. Et wier komesch, dëst Verspriechen elo ze briechen. Intern bei der Unioun gouf des Annonce begréisst. Donieft ass fir si d'Méiglechkeet vun enger grousser Koalitioun nach net ganz vum Dësch. Ob si nach eemol géif op d'SPD duergoen, géif vum Gespréich tëscht dem Bundespresident an der SPD ofhänken, sou d'Angela Merkel. Si wier jiddwerfalls zu Gespréicher bereet.
An der Emissioun Brennpunkt op der ARD sot si e Méindeg den Owend, dass et schonn e Sonndeg de Moien Unzeechen dofir gouf, dass d'Gespréicher kéinte platzen.

D'Angela Merkel



Déi däitsch Wirtschaft nennt den Echec vun Jamaika fatal. Wichteg Weichen, déi fir d'Zukunft misste geluecht ginn, géifen elo brooch leiebleiwen. Op d'Wirtschaft kéim elo eng länger Phas vun Ongewëssheet duer.

Och de franséische President Macron bedauert déi aktuell politesch Situatioun zu Berlin. Et wier net am Interessi vun der EU a vu Frankräich. Déi hollännesch Regierung schwätzt vun enger schlechter Noriicht fir Europa, well dat aflossräicht Däitschland quasi blockéiert ass.

Den EU-Kommissiounspresident Juncker dergéint gesäit kee Risiko fir Stabilitéit a Kontinuitéit.

Antëscht huet de Bundestagspresident Schäuble d'Parteien opgeruff sech kompromëssbereet ze weisen. Mam Choix vum Vollek bei de Bundestagswahlen am September misst ee responsabel ëmgoen. Däitschland wier awer net an enger Staatskris. Et wier trotzdeem eng Bewährungsprouf, esou de Schäuble.


Keen Jamaika an Däitschland / Reportage Ben Frin



D'FDP huet an Däitschland den Dram vun enger Jamaika-Koalitioun platze gelooss. No véier Woche laange Sondéierungsgespréicher gouf et e Sonndeg den Owend spéit en Echec ze notéieren. D'FDP huet d'Gespréicher mat Unioun an deene Gréngen ofgebrach. D'Parteien hätten trotz wochelaange Gespréicher keng gemeinsam Virstellung vun der Moderniséierung vum Land a virun allem keng gemeinsam Vertrauensbasis entwéckelt, sou de Parteichef Christian Lindner an enger éischter Reaktioun. Weider sot hien, et wier besser, net ze regéieren, wéi falsch ze regéieren.

De Christian Lindner (FDP) iwwert den Echec





D'Angela Merkel iwwert den Echec



De Chef vun deene Grünen, de Cem Özdemir huet betount, dass et méiglech gewiescht wier, sech eens ze ginn. Deene Liberalen hätt d'Bereetschaft fir eng Jamaika-Koalitioun awer anscheinend net eréischt deen Owend gefeelt. Mat e bësse guddem Wëllen wiere sech d'Parteien ënnerteneen och eens ginn. Déi Gréng wiere bis zu der leschter Sekonn bereet gewiescht, do nach weider ze goen, wou een eigentlech net méi weidergoe kann.

SPD steet weider net fir grouss Koalitioun zur Verfügung





Nom Echec vun enger Jamaika-Koalitioun, dat wuel op d'Sujete Migratioun a Klima zeréckzeféieren ass, huet d'Presidentin vun die Linke, Katja Kipping, Neiwahle gefuerdert. Dat sot si der Berliner Zeitung. Et misst elo sou séier wéi méiglech nei gewielt ginn. Eng Suite vun der grousser Koalitioun ass fir déi Lénk ausgeschloss. Et wier Zäit komm fir eng lénk Alternativ.

De Chef vum Bundeskanzleramt de Peter Altmaier vun der CDU fuerdert nom Eklat e Sonndeg, datt esou séier wéi méiglech kloer ass wéi eng Regierung forméiert gëtt. Dat soll bannent den nächsten dräi Woche geschéien, esou den Altmaier am Morgenmagazin um ZDF. Ee Wahlkampf bis de Summer wier net dat, wat ee bréicht.

Eng Ëmfro huet iwwerdeems erginn, dass d'Majoritéit vun den Däitschen effektiv dofir sinn, nach eemol wielen ze goen. Bal zwee Drëttel bedaueren, dass et elo awer net soll zu enger Jamaika-Koalitioun kommen, nëmmen 21% fannen dat gutt. Fir d'Majoritéit vun de Leit, déi gefrot goufen, et sinn dat 55%, ass d'FDP Schold drun, dass d'Sondéierungsgespréicher geplatzt sinn. 39% sinn der Meenung, dass déi Gréng dru Schold sinn. Eréischt hannendru kommen CSU an CDU.

51% hunn sech fir Neiwahlen ausgeschwat. 43% sinn dogéint nach eemol musse wielen ze goen. Eng grouss Koalitioun, déi d'SPD zwar ausgeschloss huet, fannen awer nach ëmmer 48% vun den Däitsche gutt. Fir nëmmen 30% wier eng Minoritéitsregierung nach eng Optioun. Sollt et zu Neiwahle kommen, si 40% iwwerzeegt dovun, dass d'AfD dovu géif profitéieren.

Reaktiounen aus Lëtzebuerg: Séier Stabilitéit am Land wier wichteg

D'Delegatioun vun CDU/CSU© AFP


Um Krautmaart war de Moien déi parlamentaresch Aussekommissioun beieneen. Op déi däitsch Situatioun ugeschwat, waren et no der Sitzung virun allem  Aussoen, datt e séiere Retablissement vu politescher Stabilitéit bei eisen Noperen enorm wichteg wier.

Den Eugène Berger vun der DP seet, datt et ni gutt ass, wann do e gewësse Flottement ass. Och wann et net de Wonsch vu Jidderengem war, ass d'SPD awer vläit elo gefuerdert, fir d'Responsabilitéit z'iwwerhuelen.

Extrait Eugène Berger (DP)



Den CSV-Deputéierte Laurent Mosar verweist op den Impakt op d'Europäesch Unioun. Grad wann e grousst Land wéi Däitschland während Méint keng Regierung huet, ass dat weder gutt fir d'EU, nach fir d'Wirtschaft an der Unioun. De Laurent Mosar hofft, datt sech déi responsabel Politiker all eng Kéier an de Spigel kucken a mat sech sëlwer an d'Geriicht ginn.

Extrait Laurent Mosar (CSV)



D'Leit nach emol an d'Wahlkabinnen ze ruffen, dat wier fir de Marc Angel vun der LSAP net de richtege Wee, grad well lescht Erfahrunge gewisen hunn, datt Neiwahlen, déi relativ no openee sinn, just geréng Ënnerscheeder erausbréngen.

Extrait Marc Angel (LSAP)



Fir den ADR-Deputéierte Fernand Kartheiser kritt d'Bundeskanzlerin Angela Merkel hei d'Rechnung fir falsch Politiken aus der Vergaangenheet. Verschidde Problemer, déi et an der EU ginn, huet d'Madame Merkel och perséinlech ze veräntweren. D'Evolutioun an der däitscher Politik vun den nächste Méint muss och eng Korrektur vun de ganz grousse Feeler vun der Regierung Merkel aus de leschte Jore sinn.

Extrait Fernand Kartheiser (ADR)



Dëst Feelverhale misst politesch Konsequenzen un, trotzdem wier et net gutt, wann e grousst Land wéi Däitschland ze laang mat onklore politesche Verhältnisser ze kämpfen hätt, esou nach de Fernand Kartheiser.

 Presserevue: Wéi geet et politesch weider?

© AFP


An de groussen däitschen Zeitunge gëtt sech e Méindeg de Moien natierlech och d'Fro gestallt, wéi et elo politesch weidergeet. D'“Frankfurter Allgemeine Zeitung“ schreift  vun der Noutbrems vun de Liberalen an d'“Süddeutsche Zeitung“ dovun, dass eist Nopeschland elo eng grouss Koalitioun bräicht.

Aus fir Jamaika / Presserevue vum Eric Ewald



Et wär keen Zeeche vu grousser Verantwortung, dass d'FDP d'Jamaika-Sondéierunge platze gelooss huet, heescht et am Kommentar vun der SZ. De Rëss, deen duerch d'Land geet, misst elo awer duerch eng grouss Koalitioun iwwerbréckt ginn. Den FDP-Parteichef Christian Lindner géif wahrscheinlech mengen, seng Partei stéing nom Echec vun de Jamaika-Gespréicher profiléiert do. Et kéim awer net drop un, dass een iergendee Profil huet, mä dorop, wat fir eent een huet. Vläicht hält de Christian Lindner sech elo fir eng „Lichtgestalt": Hie wär awer eng „Irrlichtgestalt".

Nom Jamaika-Echec géif d'Alternativ elo heeschen: grouss Koalitioun oder Neiwalen. Eng Minoritéitsregierung wär ze maachen, de Moment awer net probat. Neiwale géifen iwwerdeems héchstwahrscheinlech wéineg Changement bréngen. Et bleift also d'grouss Koalitioun. Kann een der SPD dozou roden? Et kann een, well d'Situatioun elo eng aner ass, wéi virun zwee Méint, sou d'Süddeutsche. D'SPD misst d'Saachen elo nei iwwerleeën a méi Responsabilitéit weisen, wéi déi verantwortungslos FDP.

Bei der FAZ liest een iwwerdeems, dass d'FDP an dëser Koalitioun näischt gewanne konnt. Et wär vun Ufank u kloer gewiescht, dass d'4er-Koalitioun eng Verleeënheetsléisung war, en Experiment, eng Quadratur vum Krees. Der FDP muss relativ séier kloer gewiescht sinn, dass si op verluerenem Poste stoung. Hir Begrënnung „besser net regéieren, wéi falsch regéieren" wär gutt gewielt. All d'Sträitpunkten hätten nämlech d'Substanz betraff, mat där de Christian Lindner d'FDP nees an de Bundestag bruecht hat. Virun allem beim Klimaschutz wär vun där hirem Walprogramm net vill iwwreg bliwwen. D'FDP misst sech allerdings waarm undoen.

Huet de Walkampf mat der Jamaika-Ofso vun de Liberale schonn ugefaangen? Dat wär eng Fro, déi nëmmen de Bundespresident beäntwere kéint. De Frank-Walter Steinmeier muss d'Décisioun iwwer Neiwalen huelen. Déi géife fir d'Angela Merkel de Risiko mat sech bréngen, dass de Riddo dono zougeet a jiddereen nees sou schlau ass wéi virdrun, steet et am Kommentar vun der Frankfurter Allgemeine.


Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.