VIDEO: No Attentater vu Paräis a BréisselParquet freet 20 Joer Prisong fir Salah Abdeslam

Ronn zwee Joer no den Attentater vu Paräis a Bréissel steet zanter e Méindeg eng éischte Kéier ee vun den Haaptverdächtegen an der Belsch viru Geriicht.

Parquet freet 20 Joer Prisong fir Salah Abdeslam (05.02.2018)
Ronn zwee Joer no den Attentater vu Paräis a Bréissel steet zanter e Méindeg eng éischte Kéier ee vun den Haaptverdächtegen an der Belsch viru Geriicht.

Den 28 Joer ale Salah Abdeslam kritt de Prozess gemaach - dat wéinst enger Schéisserei am Bréisseler Quartier Forest.

De 15. Mäerz 2016 wollt d'Police do eng Wunneng duerchsichen, 3 Männer hunn awer op d'Beamte geschoss. De Salah Abdeslam ass deemools mat engem zweete Mann fortgelaf, gouf awer dräi Deeg méi spéit festgeholl.

Zanter e Méindeg muss hie sech wéinst dem versichte Mord u Poliziste veräntweren. Et ass säin éischten ëffentlechen Optrëtt.

De Prozess gouf mat Spannung erwaart, besonnesch fir ze gesinn, a wéi wäit de presuméierten Attentäter dora bereet ass, mat der Justiz ze kooperéieren.

Den Ugekloten huet um Méindeg de Moien awer refuséiert, op d'Froe vun der Riichterin ze äntweren. Hien huet och refuséiert opzestoen, wéi hien opgefuerdert gouf.



Den Terrorist ass nach 2016 vun der Belsch u Frankräich ausgeliwwert ginn an ass zënterhier an engem Prisong bei Paräis. Fir d'Zäit vum Prozess gëtt hien an den Norde vu Frankräich verluecht a gëtt da vun do aus all Dag déi 140 Kilometer an de Palais de Justice op Bréissel gefouert.

D'Geriichtsgebai ass zanter e Méindeg groussraimeg ofgespaart an d'Sécherheetskontrolle sinn natierlech ganz streng.