VIDEO - SPDDe Martin Schulz verzicht op Ausseministère a GroKo

De Sigmar Gabriel, aktuell nach däitschen Ausseminister, hat seng Partei d'SPD ganz schaarf kritiséiert.

Däitschland: Martin Schulz net Ausseminister (09.02.2018)
Den SPD-Politiker verzicht ... am Interessi vun der GroKo, wéi et offiziell heescht. Den Drock war um Enn einfach ze grouss op de Politiker.

Däitsche Medien no steet den designéierten neien Ausseminister Martin Schulz partei-intern esou staark ënner Drock, dass hien op de Poste vum Ausseminister verzicht.

Direkt nom Ofschloss vun de Verhandlunge fir d'Suite vun der grousser Koalitioun gouf dem Schulz säi Réckhalt bei de Sozialdemokraten ëmmer méi kleng. Hie kritt reprochéiert, den Ausseminister vu bis ewell Sigmar Gabriel ofzervéiert ze hunn a säin eegent Wuert net gehalen ze hunn.

Direkt no de Wahlen sot de Schulz, et geet an d'Oppositioun, elo steet den Accord. Eng aner Ausso war, dass hien net Member vun enger Merkel-Regierung wéilt ginn. Duerno wollt hien de Poste vum Ausseminister.

Och bei der CDU ass d'Basis onzefridden. Si verstinn net, firwat een der SPD den Ausseminister a virun allem de Finanzressort ginn huet. Domadder wier d'CDU bannent dem Regierungsapparat strukturell geschwächt a géif un Afloss verléieren.

© AFP

Den däitschen Nach-Ausseminister Sigmar Gabriel ass elo awer déi nächst Woch bei der Sécherheetskonferenz zu München mat derbäi. Dat deelt um Freideg e Spriecher aus deem Ministère mat. En Donneschdeg hat et nach geheescht, de Sigmar Gabriel hätt net geplangt fir dohinner ze goen an de Martin Schulz géing asprangen.

Et wier besser gewiescht sech méi mat Inhalter a manner mat Persounen ze befaassen, dat sot de Vizepresident vun der SPD an Däitschland Ralf Stegner an den Tagesthemen e Freideg den Owend, no engem ganz mouvementéierten Dag bei de Sozialdemokraten. No der ëffentlecher Kritik vum Sigmar Gabriel huet de Martin Schulz jo annoncéiert awer  net Ausseminister vun der nächster grousser Koalitioun ze ginn.

Fir de Ralf Stegner ass et falsch Personaldiskussiounen ëffentlech ze féieren. Senger Meenung no, wier et och e Feeler  gewiescht d'Fraktiounscheffin Andrea Nahles schonn ëffentlech als Successeurin vum Martin Schulz un der Parteispëtzt ze designéieren.