SüdafrikaPresident Zuma zeréckgetrueden, Ramaphosa vereedegt

Ënner Drock vun der Regierungspartei ANC huet de President vu Südafrika Jacob Zuma demissionéiert. De Cyril Ramaphosa gouf um Donneschdeg vereedegt.

© AFP

Mat “effet immédiat” huet de südafrikanesche President Jacob Zuma e Mëttwoch demissionéiert. Dat, well him Korruptioun reprochéiert gouf an hien am ANC, an domadder och a senger Partei, ferm ënnert Drock stoung. Nofolger vum Zuma ass de Partei-Vizepresident Cyril Ramaphosa ginn.

Jacob Zuma trëtt zeréck / Reportage Frank Elsen


Dësen ass schonn um Donneschdeg als neie Staatschef vereedegt ginn.



Zesumme mat der Oppositioun wollten d’Politiker vum afrikaneschen Nationalkongress de Jacob Zuma um Donneschdeg ofwielen. Ma wéinst der Demissioun gouf de geplangte Vote am Parlament eben annuléiert. Nach e Mëttwoch de Mëtten hat de Zuma eng Demissioun ofgestridden. Dat well et keng Grënn fir säi Récktrëtt géif ginn.

De 75 Joer ale Politiker huet awer och annoncéiert, dat hie frou ass, dat seng Partei sech géint d'Brutalitéit vun der wäisser Minoritéit gewiert huet.

Zënter senger Demissioun ass de Gros vun der südafrikanescher Populatioun erliichtert. Während sengem Mandat wier Korruptioun, Aarmut a Chômage Realitéit gewiescht, seet d’Oppositiounspartei Demokratesch Allianz. Virgeworf gouf him, engem Familljebetrib Afloss an d’Politik ginn ze hunn, esou ewéi verschidden Cheffe vu staatlechen Entreprisen nominéiert ze hunn. De Zuma gouf bis ewell awer nach net vun der onofhängeger Antikorruptionsagence ugeklot. Dat, well hien eben all seng Reprochen zréck wéisst.

Säi ganzt Liewe laang huet hien an hie wäert och weider dem ANC déngen, dat am Objektiv un der nationaler demokratescher Revolutioun. A senger Fonktioun als President huet hien ëmmer de Gesetzer vun der Konstitutioun no gehandelt.

An och den afrikaneschen Nationalkongress ass iwwert dem Zuma seng Demissioun erliichtert. Dobäi war de Zuma schonn un der Parteispëtzt während der rassistescher Minoritéitsregierung. Am Kader vun der Lutte géint déi wäiss Regierung souz hien awer 10 Joer am Prisong. Den Ament huet d’Land e Chômagetaux vun 28 Prozent. Grouss Erausfuerderunge waarden deemno op de neie President Cyril Ramaphosa.