VIDEO: Waffepaus a SyrienAusseruerdentlech Sëtzung vum UNO-Sécherheetsrot ouni Succès

Eng ausseruerdentlech Sëtzung vum UNO-Sécherheetsrot iwwert de Syrien-Konflikt zu New York ass ouni Accord iwwert e Waffestëllstand op en Enn gaangen.

Syrien: Dauerbeschoss an der Regioun Ost-Ghuta (23.02.2018)
Eng ausseruerdentlech Sëtzung vum UNO-Sécherheetsrot iwwert de Syrien-Konflikt zu New York ass ouni Accord iwwert e Waffestëllstand op en Enn gaangen.

Schweden a Kuwait haten am Virfeld eng Resolutioun deposéiert, an där eng 30 Deeg laang Waffepaus souwéi den Accès fir humanitär Hëllef virgesi waren. D'USA haten hir Zoustëmmung signaliséiert. Russland huet allerdéngs während der Sëtzung däitlech gemaach, dass een d'Resolutioun an där aktueller Form net géif ënnerstëtzen. Russland huet doropshin eng Partie Changementer proposéiert, iwwert deenen hire Contenue awer näischt am Detail bekannt ass.

Den däitschen Ausseministère huet Russland doropshi schwéier Reprochë gemaach. D'Land hätt sech op en Neits, trotz deene schlëmmste Mënscherechtsverletzungen, virun den Assad-Regim gestallt, sou e Spriecher vum däitschen Ausseministère en Donneschdeg den Owend zu Berlin. Et war op en Neits den Appell u Russland temporär enger Waffepaus zouzestëmmen. Et géif een d'Hoffnung net opginn, dass awer nach en Accord fonnt gëtt. De schwedeschen UNO-Ambassadeur huet weider Berodungen annoncéiert, hien hofft dass et zu engem Accord kënnt.

De Chefnegociateur vun der wichtegster Oppositioun-Allianz a Syrien huet en Appell un déi international Communautéit gemaach, dem Staatschef Baschar al-Assad net ze gleewen. De Regimme hätt an de leschte Méint probéiert, der Welt den Androck ze vermëttelen, et hätt een de Krich gewonnen. Dat wier awer net wouer, sou den Nasr al-Hariri an engem Interview mat der Noriichtenagence dpa. Et wier wichteg, dass den Assad-Regim jiddwer Legitimitéit ewech geholl kritt.

D'Situatioun an der Rebellen-Enklave Ost-Ghuta an der Géigend vun Damaskus gëtt iwwerdeems ëmmer méi schlëmm. Zanter e Sonndeg koume bal 400 Zivilisten ëm d'Liewen, ronn 1.900 goufe blesséiert. D'Regioun gehéiert nach zu deene leschte Regiounen am Biergerkrichsland, déi nach ënnert der Kontroll vun de Rebelle steet. Ost-Ghuta ass zanter 2013 vun de Regierungstruppen ëmstallt. Ronn 400.000 Mënsche si wéinst dësem Blockage quasi komplett vun der Aussewelt ofgeschnidden.

Um Samschdeg wëllen d'Vertrieder am Sécherheetsrot weider un engem Text schaffen, deen och d'Zoustëmmung vu Russland kréie kéint. Sollt den Text duerchgoen, géif eng Wafferou vun 30 Deeg a Kraaft trieden, déi humanitär Hëllef fir Honnertdausende Leit erlabe géif.