No Attentat mat NervegasGroussbritannien dreet Russland mat weidere Sanktiounen

De Sträit ronderëm en Attentat mat Nervegas tëscht London a Moskau spëtzt sech zou. Dat, well Russland d'Ultimatum vu Groussbritannien net agehalen huet.

Déi britesch Premierministesch Theresa May huet Russland an der Affär Skripal mat weidere Sanktioune gedreet. Sollt Russland weider provozéieren, da kéinten nach aner Mesuren agesat ginn, sou d'Theresa May en Donneschdeg zu Salisbury. D'Sanktioune vu bis elo gesi vir, dass 23 russesch Diplomaten Groussbritannien musse verloossen.

Am oppene Konflikt tëscht London a Moskau iwwert d'Nervegëft-Attack op e russeschen Ex-Agent hu sech d'USA hanner Groussbritannien gestallt. D'Wäisst Haus huet bekannt ginn, dass ee solidaresch zu sengem enksten Alliéierte géif stoen.

An enger Drénglechkeetssëtzung vum UNO-Sécherheetsrot zu New York sot di amerikanesch Ambassadrice Nikki Haley, dass och d'USA dovun ausginn, dass Russland fir d'Attack mat enger militärescher Substanz responsabel wier. De russeschen UN-Ambassadeur Wassily Nebensia huet dës Reprochen zeréckgewisen. Hien huet London virgeheit,m e Propagandakrich géint Russland ze féieren. Et wier een net involvéiert, Russland hätt mat dësem Incident näischt ze dinn, sou den Diplomat. Ouni kloer Beweiser bräicht Moskau sech net ze justifiéieren.

Och d'NATO huet keng Zweiwel drun, dass Moskau fir d'Gëftgas-Attack responsabel ass.

De russeschen Ausseministère huet iwwerdeems d'Sanktiounen, déi di britesch Premierministesch annoncéiert hat, als reng Provokatioun bezeechent, déi hiresgläiche sicht an huet Géigemesuren annoncéiert. Moskau wëll sengersäits britesch Diplomaten ausweisen.

Däitschland, Frankräich an d'USA stelle sech am Fall vun der Gëftattack op den EX-Agent Sergej Skripal hanner Groussbritannien a fuerderen zesummen, datt d'Moskau fir Opklärung suergt.

Et handelt sech ëm en Iwwergrëff géint d'Souveränitéit vum Vereenegte Kinnekräich, schreiwen déi 4 Staatscheffen an enger gemeinsamer Erklärung. Sou eng Attack géif géint d'Bestëmmungen aus dem Ofkommes iwwer chemesch Waffen, géint d'Vëlkerrecht verstoussen a jidderengem seng Sécherheet a Gefor bréngen.