CyberattackUSA a Groussbritannien beschëllege Russland wéint "Cyber-Offensiv"

Russland soll den USA a Groussbritannien no eng riseg Cyberattack organiséiert hunn. Zil wiere Regierungen a wichteg Infrastruktur-Ariichtunge gewiescht.

De briteschen Zentrum fir Cybersécherheet, den FBI an den amerikanesche Ministère fir bannenzegst Sécherheet hunn an deem Kontext eng gemeinsam Deklaratioun publizéiert.

Op Basis vun Indicen, déi dem Geheimdéngscht virleien, gi Methoden opgelëscht, mat deene russesch Hacker Internet-Infrastrukturen infiltréiert hätten. Dës Preparative kéinten op eng Cyberattack hiweisen, sou d'Experten. Am Fokus vun enger geplangter Attack kéinten deemno Millioune vun Apparater stoen.

E Vertrieder vum Wäissen Haus schwätzt vun enger enormer Waff. D'Aktivitéite vun de sougenannten Intrusen an d'Netzwierker géife schonn zanter e puer Méint suivéiert ginn, heescht et vu britescher an amerikanescher Säit. Éischt Indicen, dass Hacker um Wierk sinn, géifen op 2015 zeréckgoen.

Zil vun de Cyberattacken wier et gewiescht, d'Aarbecht vun anere Regierungen ze stéieren a geschäftlech Aktivitéiten ze destabiliséieren, sou e Spriecher vun der britescher Regierung.

Déi presuméiert Cyberattack kéint déi schonn ugespaante Relatiounen tëscht Russland an dem Weste weider belaaschten. Och Internetrouter vu Privatpersoune sollen attackéiert gi sinn.

Vun offizieller Säit heescht et, dass d'Attack eng ganz Partie Organisatiounen, dorënner Provider vun Internetuschlëss, privat Geschäfter a wichteg Internet-Infrastrukture betrëfft.

Soss Informatiounen iwwer Affer oder soss Detailer iwwert d'Attack goufe keng genannt.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.