NoutlandungDefekt Turbinn beschiedegt Carcasse, eng Persoun gestuerwen

Um Dënschdeg den Owend koum et bei engem Fluch vu SouthwestAir vun New York op Dallas zu engem uergen Tëschefall. Eng Persoun huet net iwwerlieft.

Vun RTL
© Twitter Joe Marcus
No der Noutlandung vun engem Passagéierfliger an den USA koum eng Persoun ëm d'Liewen. D'Maschinn vun der Gesellschaft Southwest Airlines, déi zu New York gestart war, hat op eemol Problemer mam Motor. D'Boeing 737 war um Wee fir op Dallas. U Bord waren no Donnéeë vun der Airline 144 Passagéier a fënnef Leit Equipage.

E Fliger vu SouthwestAir huet missten zu Philadelphia noutlanden


Zeienaussoen no wier während dem Vol eng vun den Turbinnen explodéiert, doropshin ass eng Fënster am Fliger futti gefuer. Eng Fra, déi just virdru souz wier schwéier blesséiert ginn. Wéi et an de Medien heescht, wier d'Fra vu Stécker vun der Turbinn getraff a bal aus der Fënster gerappt ginn. Aner Passagéier hätten si fest gehalen. Déi Onglécklech huet net iwwerlieft.

Weider siwe Persoune goufe méi liicht verwonnt. De Fliger ass zu Philadelphia noutgelant.