BelschKand (2 Joer) aus Camionnette no Course-Poursuite gestuerwen

En Donneschdeg an de fréie Moiesstonnen koum et an der Belsch bei Namur zu enger Course-Poursuite tëscht enger Camionnette an der belscher Police.

Police wollt, datt d’Gefier stall hält an huet versicht, et ze blockéieren. Ma de Chauffeur vun der Camionnette huet d’Signaler ignoréiert an ass op d’Beamten zougerannt, sou datt d’Police geschoss huet.

An der Camionnette waren 30 kurdesch Flüchtlinge verstoppt. Ee klengt Meedche vun 2 Joer war drënner, dat ass méi spéit am Spidol gestuerwen. Ufanks war net sécher, duerch wat d’Kand ëmkoum. D’Police huet en Donneschdeg den Owend awer nach emol betount, datt den Doud net op d’Schëss vun de Beamten zeréckzeféiere wier.

E Freideg mellt RTL Info allerdéngs, dass d'Kand vun enger Kugel am Gesiicht getraff gouf, déi aus enger Pistoul vun der Police komm ass. Wéi et weider heescht, gëtt ugeholl, dass d'Meedchen aus der Fënster gehale gouf, fir aner Leit an der Camionnette ze schützen, quasi wéi e mënschlecht Schëld.

E Spriecher vum Parquet huet zwou Piste fir den Doud genannt. Entweder d’Kand wier krank gewiescht, oder duerch de Fuerstil vum Chauffeur an der Camionnette blesséiert ginn.