Buk-Rakéit huet Fliger getraffErmëttler: MH17 gouf mat russescher Rakéit ofgeschoss

Déi hollännesch Ermëttler si sech sécher, datt de Fliger vu Malaysia Airlines 2014 mat enger Rakéit vun der russescher Brigade erofgeschoss ginn ass.

© AFP
Knapp 4 Joer nodeems de Fluch MH17 iwwert der Ostukrain ofgeschoss ginn ass, hunn international Enquêteuren d'Rakéit enger russescher Militärbrigade zougeuerdent. Déi vun Holland geleeten Ermëttlerkommissioun ass zur Konklusioun komm, datt d'Rakéit vum Typ Buk-Telar, mat där de Passagéierfliger vu Malaysia Airlines am Juli 2014 ofgeschoss gouf, vun der 53. Brigade am russesche Kursk komm ass, sou den Ermëttler Wilbert Paulissen zu Utrecht.   

Et baséiert ee sech op e sëlleche Videoen, Fotoen an Zeienaussoen.

De russesche President Vladimir Putin huet no den Accusatiounen ëm d’Ofschéisse vun der Malaysia Airline 2014, e Freideg den Owend nach emol betount, näischt mam Virfall ze dinn ze hunn. De Fliger wier net vun enger russescher Rakéit getraff ginn, esou wéi international Ermëttler dat behaapten. D‘Enquête wier net vertrauensvoll an et géife verschidde Versioune ginn, esou de Putin e Freideg zu Sankt Petersburg.

D’EU esou wéi d’NATO hu Russland opgefuerdert, Verantwortung fir den Tëschefall ze huelen.

D'Boeing 777 war de 17. Juli 2014 um Wee vun Amsterdam op Kuala Lumpur ofgeschoss ginn. Vun den 298 Leit, déi u Bord vum Fliger waren, hat keen d'Katastrof iwwerlieft. An der Maschinn souz och eng Famill vu Réiser, déi um Wee an d'Vakanz war.

RTL-NEWS: Crash vun MH17: Affer vu Réiser goufen identifizéiert