IrlandMajoritéit fir Enn vum Ofdreiwungsverbuet

D'Iren hunn e Freideg an engem Referendum iwwert en Enn vum Ofdreiwungsverbuet an der Verfassung vum Land ofgestëmmt.

D’Majoritéit vun den Irlänner seet Jo zu engem manner strikten Ofdreiwungsgesetz. Dat geet aus engem Sondage ervir, deen nom Referendum gemaach gouf, enger sougenannter Nachwahlbefragung. 68 Prozent vun den Iren géife sech deemno fir d’Ophiewe vum Ofdreiwungsverbuet ausschwätzen. 32 Prozent wieren dogéint. Sollt de Camp vun de Verbuetsgéigner definitiv gewannen, dann huet d’Regierung Wëlles een Ofbroch vun der Schwangerschaft virun der 12. Woch net méi ze bestrofen.

3,5 Millioune Bierger waren opgeruff beim Referendum matzemaachen. Um Samschdeg de Moie sollen d’Stëmmen ausgezielt ginn. Mat engem Resultat gëtt um Samschdeg de Mëtteg gerechent.

Historique vum Verbuet
Zanter 1980 sinn an Irland iwwer 170.000 Fraen a Meedercher an d'Ausland gaangen, fir ofzedreiwen. An all Dag gi ronn 9 Frae fir dës Prozedur an England. Well an Irland ass den Avortement per Verfassung verbueden. A wien awer an Irland ofdreift, dee ka mat bis zu 14 Joer Prisong bestrooft ginn. Souguer no enger Vergewaltegung ass et an Irland verbueden, fir ofzedreiwen. Ma dat ka sech e Freideg bei engem Referendum änneren.

Referendum an Irland/Reportage Anne-Sophie Heck

Mir schreiwen d'Joer 1992 an ee 14 Joer alt Meedche gëtt an Irland vergewaltegt an duerno schwanger. D'Geriicht huet an enger éischter Phas den Avortement am Ausland verbueden, obwuel d'Meedche suizidär war. Et koum deemools zu Protester op béide Säite vum Debat an no engem Referendum gouf d'Ofdreiwung am Ausland erlaabt.

Bis iwwer d'Thema Suicide an d'Gefore fir d'Mamm debattéiert gouf, huet et duerno gutt 10 Joer gedauert. 2012 koum et erëm zu engem Skandal, wéi d'indesch Zänndoktesch Savita Halappanavar an der 17. Schwangerschaftswoch no Komplikatioune bei enger Feelgebuert gestuerwen ass. An der Klinik gouf hir eng Ofdreiwung refuséiert, well si net a Liewensgefor gewiescht wier. Nieft medezinesche Virwërf war deemools och dat strengt irescht Ofdreiwungsverbuet an der Kritik. Well et war net genee festgehalen, wéini, datt eng Fra ënner Liewens- oder Suicide-Gefor legal avortéiere kéint. 2013 gouf dat doropshi gesetzlech präziséiert.

Zanterhier hunn d'Vereenten Natiounen ëmmer nees dësen Deel vun der irescher Konstitutioun als "onmënschlech a grausam" kritiséiert. D'Ofdreiwungsverbuet ass fest am déif-kathouleschen Irland verankert. Vum Referendum e Freideg erwaarde sech Experten ee ganz knappt Resultat.

Dat kathoulescht gepräägte Land huet eent vun de strengste Gesetzer an dësem Beräich an der Europäescher Unioun.

Zanter 2013 sinn IVGe just erlaabt, wann d'Liewe vun der Mamm a Gefor ass. Dausenden Irinne sinn all Joer gezwongen, fir en Avortement an d'Ausland ze goen.


Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.