Historesche SommetTrump annoncéiert offiziellt Enn vum Korea-Krich

De Kim Jong Un huet sech zu enger kompletter Denukleariséierung op der koreanescher Hallefinsel engagéiert. De Korea-Krich soll geschwënn eriwwer sinn.

Trump annoncéiert offiziellt Enn vum Korea-Krich (12.06.2018)
De Kim Jong Un huet sech zu enger kompletter Denukleariséierung op der koreanescher Hallefinsel engagéiert. De Korea-Krich soll geschwënn eriwwer sinn.

"D'Welt wäert scho ganz séier e gréissere Changement gesinn", sou d'Wieder vum nordkoreanesche Staatschef Kim Jong Un um Dënschdeg de Moien op enger Pressekonferenz zu Singapur, nom historesche Sommet mam amerikanesche President Donald Trump. Béid Politiker hu virun den Ae vun der Weltpress e gemeinsam Deklaratioun ënnerschriwwen.

Sommet Trump-Kim: E Reportage vum Claudia Kollwelter



Trump annoncéiert offiziellt Enn vum Korea-Krich (12.06.2018)
De Kim Jong Un huet sech zu enger kompletter Denukleariséierung op der koreanescher Hallefinsel engagéiert. De Korea-Krich soll geschwënn eriwwer sinn.


An dësem Dokument huet sech de Kim Jong Un zu enger kompletter Denukleariséierung op der koreanescher Hallefinsel engagéiert. Den amerikanesche President huet als Géigeleeschtung "Sécherheetsgarantien" fir Nordkorea zougesot.

Des géif séier, ganz séier ufänken, sou den Trump bei der Signature vum Dokument. Soss Detailer goufe keng genannt. Weider huet den US President annoncéiert, dass hien de Kim Jong Un fir weider Gespréicher wëll an d'Wäisst Haus op Washington invitéieren. Den Donald Trump huet erkläert, datt ee mat internationaler Bedeelegung d'Denukleariséierung vun Nordkorea wäert kontrolléieren, ass awer net weider an den Detail gaangen.

Op der gemeinsamer Pressekonferenz huet den Donald Trump betount, dass hei e ganz wichtegt Dokument ënnerschriwwe gi wier. Et wier een houfreg dorobber wat haut geschitt ass.



Um 10.15 Auer eiser Zäit huet den Donald Trump sech eleng virun d'Press gestallt a weider Detailer zum Accord ginn, deen ënnerschriwwe gouf. Hei huet den amerikanesche President dann och ugekënnegt, dass de Korea-Krich geschwënn offiziell eriwwer wier. D'Kämpf am Korea-Krich waren 1953 op en Enn gaangen, e Friddensofkommes war awer ni ënnerschriwwe ginn.
D'Krichsspiller mat Südkorea géifen och gestoppt ginn. Wann een elo een Accord mat Nordkorea ënnerschreift wou et ëm Denukleariséierung an ëm Fridden geet, maache sou Manöver kee Sënn. Derbäi kënnt, dass een doduerch immens vill Sue géif spueren. Den Donald Trump huet ëmmer nees insistéiert, dass hie keng Ageständnisser gemaach huet... hien hätt Zäit investéiert fir dëse Sommet, dat wier alles. De Kim Jong Un soll no der Ënnerschrëft vum Accord nach zougestëmmt hunn, en Testgelänn fir Atombommen komplett ze zerstéieren. D'USA haten am Virfeld 300 Sanktioune géint Nordkorea preparéiert. Déi hätt een awer natierlech net virum Sommet ëffentlech gemaach. Dem Donald Trump seng Deklaratioun virun der Press huet eng Stonn gedauert.



De Sommet hätt net kënne besser verlafen, sou den US President Trump. D'Relatiounen tëscht him an dem Kim Jong Un wieren exzellent. Hien huet dem nordkoreanesche Staatschef no deene 5 Stonne laange Gespréicher Merci gesot. Hien hätt eng besonnesch Relatioun zum Kim Jong Un opgebaut. Et géif ee sech nach méi wéi eng Kéier gesinn.

Den Donald Trump iwwert de Sommet mam Kim Jong Un



Och de Kim Jong Un sot, dass et gutt Gespréicher gewiescht wieren an een d'Vergaangenheet wéilt hannert sech loossen. En historescht Dokument wier um Enn eraus komm.  Et war déi éischte Kéier, dass en amerikanesche President an e nordkoreanesche Staatschef beienee koumen.



No joerzéngtelaangen Hostilitéiten tëscht Nordkorea an den USA hu sech elo éischt Fortschrëtter ugedeit.

Mat dëser éischter perséinlecher Renconter an engem Luxushotel op der Insel Sentosa wollte béid Politiker en Neiufank an hire Relatiounen entaméieren. Et goung ëm den Ofbau vun atomare Waffen an eng Friddensléisung fir di koranesch Hallefinsel souwéi wirtschaftlech Hëllefen fir dat gréisstendeels isoléiert kommunistescht Land.

De Wee wier net einfach gewiescht, sot de Kim Jong Un virum Optakt vum Sommet viru Journalisten. Al Praktiken a Viruerteeler hätten awer kënnen aus dem Wee geraumt ginn an elo wier een hei.

Um 3 Auer Hënt eiser Zäit hate sech den Donald Trump an de Kim Jong Un eng éischte Kéier perséinlech d'Hand ginn. An engem Luxushotel zu Singapur hunn sech béid Männer virun de Fändele vun den USA an Nordkorea d'Hand gereecht. Si waren dobäi seriö an och ugespaant.



Nieft dem Donald Trump souzen den US Ausseminister Mike Pompeo, den nationale Sécherheetsberoder John Bolton an dem Trump säi Chef de Cabinet John Kelly mat um Dësch. De Kim Jong Un gouf ënnert anerem vu sengem fréiere Geheimdéngschtchef Kim Yong Chol begleet.



Am Virfeld: Preparatioune lafen op Héichtouren

Häerzattack

Kuerz virum Sommet huet zu Washington iwwerdeems de Larry Kudlow missten hospitaliséiert ginn. De Chef-Wirtschaftsberoder vum Trump hat eng Häerz-Attack. Hien war de Weekend iwwer nach een vun den Haapt-Negociateuren vun den USA um G7-Sommet a Kanada.



Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.