MëttelmierNet Italien oder Malta, ma Spuenien soll Flüchtlingen ophuelen

Déi 629 Flüchtlingen, déi zanter dem Weekend op engem Schëff am Mëttelmier blockéiert sinn, sollen elo a Spuenien bruecht ginn. Dat dauert awer 4 Deeg.

D'Schëff mat iwwer 600 Flüchtlingen dreift weider um Mier, a soll dann elo vu Spuenien opgeholl ginn. Op d'mannst 4 Deeg laang kéint awer nach den Trajet bis op Valencia daueren.

D'Corse hat och proposéiert d'Schëff opzehuelen. Dovunner schéngt awer net profitéiert ze ginn. Et ass en Hin an Hier.

D'Schëff mat 629 Migranten u Bord ass am Gaangen säin Trajet Direktioun Spuenien ze preparéieren. Déi nei italienesch Regierung hat dem Schëff den Accès an en Hafen an Italien refuséiert. Malta wollt d'Leit och net ophuelen.

Um Rettungsschëff vu Médecins sans frontières sinn d'Conditioune fir déi iwwer 600 Leit net gutt. Et feele Liewensmëttel an d'Wiederkonditiounen sinn och net optimal.