DenukleariséierungMike Pompeo reagéiert op Kritik no Deklaratioun vu Singapur

Den nordkoreanesche Staatschef Kim Jong Un ass sech der Drénglechkeet vun der Denukleariséierung bewosst, seet den amerikaneschen Ausseminister Pompeo.

Hien huet op enger Pressekonferenz mat den Ausseminister vu Südkorea a Japan zu Seoul däitlech gemaach, dass d'Sanktioune géint Pjöngjang sou laang bestoe bleiwen, bis de Prozess vun der nuklearer Ofrëschtung ofgeschloss ass.

Washington wier weiderhi fest decidéiert, dass Nordkorea säin Arsenal un atomare Waffen komplett ofgebaut an och keng nei Waffe ka bauen. Weider misst dat iwwerpréift ginn, sou de Mike Pompeo. Den amerikaneschen Diplomatiechef huet domat op Kritike reagéiert, déi et un der Deklaratioun nom historesche Sommet tëscht dem US President Trump an dem Kim Jong Un zu Singapur ginn hat. Kritiséiert gouf virun allem dass an dësem Dokument keng Detailer iwwert Denukleariséierung festgehale goufen.

Donald Trump relativiséiert Mënscherechtsverbrieche vum Kim Jong Un

No senger Entrevue en Dënschde mam nordkoreaneschen Diktator, huet den amerikanesche President Donald Trump e Mëttwoch d’Mënscherechtsverbrieche vum Kim Jong Un relativiséiert. Hie géif eng ganz Partie Länner kennen, déi sech eppes zu Schold komme gelooss hunn, esou den Trump um Sender Fox News. De Kim Jong Un wier een Zitat „schlaue Kärel“, ee „groussaartegen Negociateur“, mat deem hie sech kéint verstoen. Och fir de chinesesche President Xi huet den Trump positiv Wierder fonnt. Dee wier President op Liewenszäit, an dat wier gutt esou, sot den amerikanesche President.