No Faillite-Uerteel zu London"Dem Boris Becker säin zentralafrikanesche Pass ass eng Fälschung"

Déi fréier Tennislegend Boris Becker wollt diplomatesch Immunitéit spille loossen, dat am Kader vun enger Prozedur fir Insolvenz a Groussbritannien.

© afp
Elo huet déi Zentralafrikanesch Republik awer dementéiert, dass de Boris Becker diplomatesch Immunitéit soll hunn. Dat huet den Ausseminister vun der Zentralafrikanescher Republik, de Charles Armel Doubane der WELT gesot. Hien hätt keng offiziell diplomatesch Positioun.

De Charles Armel Doubane huet ënnerstrach, dass nieft der Ernennung vum President och dem Ausseminister seng Ënnerschrëft néideg wier, fir als Diplomat ernannt ze ginn an déi entspriechend Dokumenter hätt hien net ënnerschriwwen.

Et hätt wuel Gespréicher ginn tëscht dem Becker an dem President vun der Zentralafrikanescher Republik, ma et wéilt een net mam Becker senge finanzielle Problemer associéiert ginn.

En Dënschdeg den Owend huet de Boris Becker reagéiert a gemengt, datt et e Fakt wär, datt hien am Moment Diplomat vun der Zentralafrikanescher Republik ass. Weider huet de Becker verséchert, datt hien am Abrëll vum President Faustin Archange Touadera zum Attaché fir Sport, Kultur an humanitär Zwecker designéiert gi wär, de Pass hätt hi vum Ambassadeur Daniel Emery Dede am Abrëll kritt.  

De fréieren Tennisprofi war am Juni 2017 vun engem Geriicht zu London als faillite erkläert ginn, well hie seng Scholden net bezuelt hat. Am Abrëll dëst Joer war den dräifache Wimbledongewënner vun der Zentralafrikanescher Republik als Spezial-Attaché fir Sport a Kultur an der Europäescher Unioun ernannt ginn.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.