VIDEO - Drama an Thailand eriwwerSämtlech 13 Persounen aus der Hiel gerett

Zanter e Sonndeg konnte schonn 8 Jonker a Sécherheet bruecht ginn. En Dënschdeg kuerz viru 14 Auer waren du sämtlech Leit vum Grupp aus der Hiel befreit.

Um 5 Auer en Dënschdeg de Moien huet de Rettungsasaz vun de leschte Jugendlechen ugefaang a kuerz viru 14 Auer koum d'Nouvelle, dass all d'Jongen an den Trainer aus der Hiel gerett konnte ginn, déi ganzer 17 Deeg do festsouzen. D'Hoffnung war grouss an et gouf deemno e glécklecht Enn.

Elo musse just nach 4 Secouristen aus der Hiel geholl ginn, dorënner een australesche Medeziner, deen do ass fir am Noutfall 1. Hëllef ze leeschten.



Déi éischt Phas vun der Rettungsaktioun war ouni Problemer verlaf an et war alles méi séier gaangen wéi erwaart. D'Rettungsekippen haten e Sonneg de Moien decidéiert, definitiv mat der Rettungsaktioun unzefänken. Déi schlecht Wiederprevisiounen haten den Drock weider erhéicht. Zanterhier konnte schonn 8 Jonker a Sécherheet bruecht ginn. Si all wieren an engem gudde gesondheetlechen Zoustand, soten déi thailännesch Autoritéiten en Dënschdeg de Moien. Keen hätt Féiwer. Déi éischt 4, déi gerett goufen, hunn och schonn hir Famillen dierfe gesinn. Eng Woch sollen se awer am Spidol bleiwen.

© AFP

Alles an allem ware 50 auslännesch a 40 thailännesch Sportstaucher am Asaz.

D'Jonge hu missen iwwer e puer Kilometer zum Deel tauchen, an haten déi lescht Deeg en deementspriechenden Training kritt.  D'Rettungsaktioun war immens geféierlech. Esouguer Taucher mat Experienz hu 5 bis 6 Stonnen gebraucht, fir vum Punkt, wou d'Jongen agespaart sinn, bis zum Ausgang vun der Hiel ze kommen.

Bei der Rettung vun de Jugendlechen ass en Taucher e Freideg ëm d'Liewe komm. Den Ex-Zaldot vun der thailännescher Militärunitéit Navy Seals Saman Kunan wollt Sauerstoff an d'Hiel bréngen, de Réckwee huet hien awer net iwwerlieft. Hie ass u Sauerstoffmangel gestuerwen.



D'Bouwen am Alter vun 11 bis 16 Joer waren den 23. Juni mat hirem Coach Ekkapol Chantawong an d'Hiel Tham Luang-Khun Nam Nang Non an der Provënz Chiang Rai geklommen, dat well si wuel vu Waassermassen iwwerrascht gi waren.

Ewéi d'Waasser an der Hiel ugefaangen huet, mat klammen, si si ëmmer méi déif an d'Hiel geflücht, fir net ze erdrénken. Op Plazen an der Hiel stoung d'Waasser nämlech op Aenhéicht vun engem Erwuessenen.

D'Jonge waren no 9 Deeg fonnt ginn. Déi schwiereg Rettungsaktioun war mat der Lokalisatioun vun deene Vermëssten awer net eriwwer. Grouss Deeler vun der Hiel stinn nach ënner Waasser.

Rettungsaktioun an Thailand (08.07.2018)
E Spriecher vum thailännesche Verdeedegungsminister huet confirméiert, dass déi éischt 4 Kanner gerett sinn. Virdru war nach rieds vu 6 Kanner.


Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.