Trump a GroussbritannienNo Frontal Attack géint May gëtt vu "Fake News" geschwat

Hefteg Kritik vum US-President Trump un d'Adress vun der britescher Premierministesch, wat d'Brexit-Pläng vun der Regierung betreffen.

No Frontal Attack géint May gëtt vu "Fake News" geschwat (13.07.2018)
Hefteg Kritik vum US-President Trump un d'Adress vun der britescher Premierministesch, wat d'Brexit-Pläng vun der Regierung betreffen.

Trump op Visitt zu London / Reportage Claudia Kollwelter



Kuerz virum Optakt vu senger 4 Deeg laanger Visitt a Groussbritannien huet den Donald Trump d'Theresa May an engem Interview mat der Zeitung "The Sun" frontal attackéiert. Sollt de Plan sou ëmgesat ginn, géif dat e bilateralen Accord tëscht Washington a London wahrscheinlech ëmbréngen, sou den Trump. Hie sot, dass hien anescht un de Brexit erugaange wier, wéi déi britesch Regierung. Hien hätt souguer der Theresa May gesot, wéi si et soll maachen, mä si hätt net op hie gelauschtert, sou den amerikanesche President.

No den abléckleche Pläng hätt een et mat der Europäescher Unioun ze dinn amplaz mat Groussbritannien, gëtt den Donald Trump mat Bléck op déi geplangte Fräihandelszon mat der EU zitéiert. Déi britesch Premierministesch Theresa May strieft nom Austrëtt vun hirem Land weiderhin enk wirtschaftlech a regulatoresch Relatioune mat der EU un. Iwwert de Récktrëtt vum Ausseminister Boris Johnson huet sech den Donald Trump enttäuscht gewisen a sot, dass der Theresa May hire Géigner en exzellente Premier wier.

Den US-President a seng Fra Melania sinn en Donneschdeg den Owend nom Nato-Sommet fir eng 4 Deeg laang Visitt a Groussbritannien ukomm. Owes stoung en Owendiessen um Programm, ier den Donald Trump dann e Freideg mat der Theresa May fir Gespréicher beienee kënnt.

D'Theresa May steet virun engem Dilemma. Op där enger Säit fuerdert d'britesch Ëffentlechkeet, datt si sech kloer géint den Trump positionéiert. Ronn 1,8 Millioune Leit haten eng Petitioun ënnerschriwwe géint de Besuch vum US-President. Zu London ginn sech um Freideg massiv Anti-Trump-Protester erwaart. E risege Ballon a Form vun enger Trump-Karikatur soll iwwert dem Parlament fléien.

Op där anerer Säit ass d'Premierministesch op den US-President ugewisen. Si muss d'Relatioune mam Donald Trump verbesseren, wëll de Brexit se elo schonn dozou zwéngt, un de bilateralen Handelsrelatiounen ze feilen. Wa Groussbritannien d'EU verléisst géif et dem Theresa May no keng Allianz ginn, déi an den nächste Joer méi wichteg wier wéi déi mat den USA.

Den Donald Trump a seng d'Kritik u Groussbritannien

A Groussbritannien hunn zéngdausende Leit géint d'Visitt vum US-President Trump demonstréiert.

Am Mëttelpunkt vum Besuch sti politesch Gespréicher mat der britescher Premierministesch May. D'Stëmmung ass net grad déi Bescht nom Trump sengen Aussoen am Virfeld vun der Visitt.

Hien hat an engem Interview der Theresa May hier Brexit-Taktik kritizéiert. Si hätt den Austrëtt aus der europäescher Unioun an de Sand gesat. Sollt Groussbritannien, esou wéi d'Premierministesch et wëll, weider enk un der EU gebonne bleiwen, géif dat d'Aussicht op ee bilateralen Handelsaccord tëscht London a Washington zerstéieren.

Hien hätt der Theresa May gesot wéi si et soll maachen. Si hätt awer net op hie gelauschtert. An engems huet hien de Boris Johnson, deen als Ausseminister demissionéiert huet an als Brexit-Hardliner gëllt, gelueft. Den Johnson géif ee groussaartege Premier ginn.

E Freideg sot den Trump, dat wiere Fake News. Et géif am Dossier Brexit keen Desaccord tëscht London a Washington ginn. E Freideg de Mëtteg kommen den US-President an d'Premierministesch nach emol zesummen. Dono gëtt d'Presidentekoppel vun der Kinnigin Elizabeth II. op Schlass Windsor empfaangen. E Freideg den Owend fueren de President an d'First Lady weider a Schottland, wahrscheinlech am Donald Trump säi Luxus-Golfclub Turnberry, ier en dann e Méindeg zu Helsinki mam russesche President Wladimir Putin zesumme kënnt.

Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.