Frankräich ass WeltmeeschterVill gefeiert a vill randaléiert, 3 Kanner bei Nanzeg vu Moto ugestouss

Op ville Plazen a Frankräich gouf d'WM-Victoire gefeiert. Allerdéngs koum et och zu enge sëllechen Affrontementer an deels schwéieren Accidenter.

© AFP

Frankräich ass Futtball-Weltmeeschter. 4-2 gewënnt d'Equipe Tricolore e Sonndeg den Owend zu Moskau géint Kroatien. Eis franséisch Noper hunn domat fir d'zweete Kéier no 1998 d'WM gewonnen.

Während Honnertdausende vu Supporter op de Champs-Elysées zu Paräis gefeiert hunn, hunn Dosende vu Jugendlecher d'Fënstere vun de Geschäfter op deem berühmte Boulevard an der franséischer Haaptstad futti geschloen. Et koum dobäi och zu Affrontementer mat der Police. Eng 30 Jugendlecher hunn op de Champs-Elysées eng Apdikt ausgeraumt. Si goufe vun der Police mat Tréinegas verdriwwen.







Och an anere franséische Stied koum et zu Eskalatiounen, dorënner zu Lyon, Marseille, Stroossbuerg a Rouen. Zu Lyon ware ronn Honnert Jugendlecher mat der Police unenee geroden. Eleng zu Paräis waren iwwer 100.000 Polizisten am Asaz.







Zu Paräis gouf et am Ganzen 102 Interpellatiounen an 90 Leit goufen an de Garde à vue gesat. Op ganz Frankräich gekuckt, goufen 292 Leit an de Garde à vue gesat.

Et goufen och eng ganz Partie uerg Accidenter um Bord vun de WM-Feierlechkeeten, dorënner zu Frouard an der Géigend vun Nanzeg. Hei goufen dräi Kanner am Alter vun 3 a 6 Joer schwéier verwonnt, wéi e Motorrad a se gerannt ass. De Motorradsfuerer huet sech nom Ongléck ewech gemaach.

Zu Paräis gouf e Mann duerch eng Kläpperei schwéier blesséiert. Zu Annecy ass e Mann vu 50 Joer gestuerwen, wéi hien, nodeems de Match ofgepaff war, an e flaache Kanal gesprongen ass a sech dobäi d'Genéck gebrach huet. Am Norde vu Frankräich, zu Saint-Félix ass e Mann ëm d'Liewe komm, wéi hie kuerz no der Finall an e Bam gerannt ass.



Zu Stuttgart hate sech ronn 7.000 kroatesch Fans versammelt, fir d'Finall ze suivéieren. 55 Persoune goufe festgeholl, well si sech net un d'Virschrëfte gehalen hunn, heescht et vun der Police. Fënnef Beamte goufe liicht blesséiert. A Baden-Württemberg liewen iwwer 100.000 kroatesch Staatsbierger, dat sinn der méi wéi an all anerem Bundesland.

An och England wierdegt seng Nationalekipp fir déi bescht WM zanter 28 Joer. Wéi déi Responsabel vum ëffentlechen Transport zu London d'Verwaltung Transport e Méindeg matgedeelt ginn, heescht d'Metrostatioun "Southgate" op der Piccadilly Line 24 Stonne laang "Gareth Southgate", dat heescht wéi den englesche Coach, deen Uganks vun der englescher Press an de Fans ganz kritesch gesi gouf.

Flitzer-Aktioun vu Pussy Riot
Si huet schonn e puer Mol fir Opreegung gesuergt, déi russesch Fraen-Punkband Pussy Riot. Et war dann och si, déi e Sonndeg fir d'Flitzer-Aktioun während der Finall zu Moskau responsabel war. An de soziale Medien huet d'Band direkt e puer politesch Fuerderunge gestallt.

Ënnert anerem sollten all politesch Gefaangener fräi gelooss ginn a si huet en Enn vun Arrestatiounen während friddleche Protester gefuerdert. Dräi Fraen an ee Mann a Polizistenuniforme ware während der Finall tëscht Frankräich a Kroatien op den Terrain am Luschniki-Stadion gelaf. De Match gouf kuerz ënnerbrach. D'Sécherheetsbeamten hunn déi véier Aktivisten vum Terrain geschleeft, déi sech zu kengem Ament gewiert hunn. Wéi russesch Medie mellen, goufen se op de Policebüro bruecht.