VIDEO - RyanairPiloten hunn es genuch, wëllen awer nees verhandelen

Nom 24 Stonne laange Streik vun de Pilote bei Ryanair, wëll déi däitsch Pilotegewerkschaft Cockpit sech nees un de Verhandlungsdësch setzen.

Ryanair: D'Piloten hunn es genuch (10.08.2018)
Ze niddreg Paien, ze vill Fluch-Stonnen, dobäi nationaalt Recht, wat net consideréiert gëtt.
Ze niddreg Paien, ze vill Fluch-Stonnen, dobäi nationaalt Recht, wat net consideréiert gëtt. Dat ass een Deel vun der Lëscht vu Problemer, wéinst deenen d’Pilote vun der irescher Bëllegfluchgesellschaft Ryanair e Freideg gestreikt hunn. A 5 Länner bloufen hir Fligeren um Buedem, vun e Freideg 3 Auer an der Nuecht bis e Samschdeg de Moie fréi. Also matten an der Touristesaison.

Ugespaant Stëmmung e Freideg dann och op vill Fluchhäfen a Schweden, Irland, Holland, der Belsch an Däitschland. D’Fligere vu Ryanair bloufen eidel an um Buedem an Honnerte Flich goufe gestrach. Et gouf gestreikt fir besser Aarbechtskonditiounen a méi héich Paien, d’Piloten hunn es genuch.

Fir d’Fluchgesellschaft ass de Streik onnéideg. Ryanair hätt versprach, d’Gewerkschaften unzëerkennen a Kollektivverträg ze maachen, huet et am Virfeld vun der Aktioun geheescht.

De Findel war net vum Streik betraff, ma wéi gesot d’Fluchhäfen an den Nopeschlänner Däitschland a Belsch. A wat maachen, wann een duerch de Streik net fléie kann? Wéi gëtt een entschiedegt?

Virun 2 Joer hunn d’Pilote vun der Lufthansa gestreikt. D’Karin Basenach vum Europäesche Konsumentenzentrum zu Lëtzebuerg war selwer betraff an hëlt hir Affär als Beispill. Si ass virun d’Friddensgeriicht gaangen an huet do Recht kritt. Lufthansa huet ewell d’Suen iwwerwisen. Esou eng Prozedur wier net schwéier a wéi hire Fall et weist, hätt ee gutt Chancen, bei engem Streik ze gewannen. Ma fir d’éischt soll ee sech natierlech bei der Fluchgesellschaft selwer mellen. Géif Ryanair dann net äntweren, da kéint een op d’Geriicht goen. An dësem Fall an de betraffene Nopeschlänner.

Nom 24 Stonne laange Streik vun de Pilote bei Ryanair wëll déi däitsch Pilotegewerkschaft Cockpit sech nees un de Verhandlungsdësch setzen. Et misst een doriwwer beroden, wéi et elo sollt weidergoen. De Streik soll aktuell net verlängert ginn. Mä d’Gewerkschaft schléisst nei Aktiounen net aus, soulaang et kee Kompromëss an den Diskussiounen ëm d'Aarbechtsbedéngunge gëtt.

Wéinst dem Streik waren a 5 Länner eng ganz Partie Vollen ausgefall, ronn 55.000 Passagéier ware concernéiert.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.