Kritik vun AwunnerIsrael entwéckelt sech zu engem "Apartheid-Regime"

Schaarf Kritik um Regime an Israel kënnt aktuell vun dausenden arabeschen Awunner.

Arabesch Israelien bei enger Manifestatioun.© AFP (Archiv)

Déi israelesch Regierung wier ee Regime, deen Apartheid géif bedreiwen. Dëse Reproche koum e Samschdeg den Owend vun dausenden arabeschen Israelien, déi domadder géint dat neit Nationalstaategesetz an Israel protestéiert hunn. Och jiddesch Israelien hunn un der Demonstratioun deel geholl, déi d'Gesetz och kritiséieren an vun Diskriminatioun schwätzen.

Am Juli war de Gesetzestext gestëmmt ginn, deen erkläert, datt Israel de Nationalstaat vum jiddesche Vollek wier.

Deemno hätte just Judden ee Recht op Selbstbestëmmung. Deem Gesetz no wier an Zukunft och just nach Hebräesch déi national Sprooch, Arabesch dogéint net méi. Déi Sprooch kritt ee spezielle Statut.

Weider gëtt am Text och präziséiert, datt de Bau vu jiddesche Gemengen extra gefërdert gëtt

Den israelesche Regierungschef Netanyahu huet op d'Kritike reagéiert an ass do net vu senger Positioun ofgeréckelt. Ouni dat Gesetz wier et onméiglech, fir déi nächst Generatioun d'Zukunft vun engem Israel als jiddeschen Nationalstaat ze garantéieren, esou de Netanyahu.