AntwerpenBrand a Lagerhal am Hafen, Ëmgéigend evakuéiert

An der Hal, déi vum Feier betraff ass, sinn Nickelsulfide stockéiert, wat fir de Mënsch net ongeféierlech ka sinn.

Zanter e Samschdeg den Owend brennt et am Hafen vun Antwerpen. D’Feier ass an enger Lagerhal vun 6.000 Meter Carré ausgebrach, wou Nickelsulfide stockéiert sinn. E Sonndeg de Moien huet d’Gemeng Antwerpen dunn eng Phase d’Urgence ausgeruff. Entreprisen a Schëffer, déi an engem Rayon vun 1,8 Kilometer ëm d’Lager sinn, goufen evakuéiert, well duerch den Damp d’Leit Otemproblemer an Irritatioune kënne kréien.




D’Awunner an de Gemengen ronderëm musse wärend der Phase d’Urgence hir Fënsteren zouloossen. D’Feier wier nach ëmmer net ënner Kontroll, heescht et vun den Autoritéiten.