Bréck bei Genua an de Koup gefall39 Doudeger offiziell confirméiert, dorënner 3 Kanner

De Parquet schwätzt iwwerdeems ewell vun 42 Doudesaffer. Vill Blesséiert schwiewen nach a Liewensgefor, d'Zuel vun den Affer dierft also nach eropgoen.

D'Hoffnung gëtt ëmmer méi kleng, dass zu Genua nach Iwwerliewender fonnt ginn, nodeems en Dënschdeg e Stéck vun enger Autobunnsbréck an e Koup gefall war. Ongeféier 35 Autoen an 3 Camione sinn eng 45 Meter an Déift gefall. Bis ewell goufen 39 Doudesaffer offiziell confirméiert.

Den italieneschen Inneminister a Vizepremier Matteo Salvini sot e Mëttwoch den Owend op der italienescher Tëlee, dass d'Warscheinlechkeet leider ganz grouss wier, dass ënnert den Debrisen nach weider Affer léichen.

Déi zweet Nuecht hannerteneen hunn d'Secouriste mat Héichdrock ënnert deene schwéiere Bëtongsbléck a stole Seeler no weideren Affer gesicht. Ënnerstëtzt gi si vu Sichhënn. Bis ewell goufe 16 Blesséierter gebuergen. Néng dovu schwiewen a Liewensgefor. Nach ëmmer gi Leit vermësst. Ënnert den Doudesaffer sinn och dräi Kanner am Alter tëscht 8 an 13 Joer, souwéi véier jonk Fransousen, dräi Chilenen an ee Kolumbianer.



Fir déi 39 Doudesaffer, déi bis ewell gebuerge goufen, soll et e Samschdeg e Begriefnis ginn, sou de Premier Giuseppe Conte op Facebook. Fir deen Dag gëllt an Italien och eng Staatstrauer. Den italienesche Parquet schwätzt iwwerdeems vun 42 Doudegen.

Déi italienesch Regierung huet e Mëttwoch en 12 Méint laangen Ausnamezoustand fir d'Hafestad Genua verhaangen a fënnef Milliounen Euro Nouthëllef deblockéiert. Dem Bedreiwer vun der Autobunn dreet d'Regierung, d'Lizenz ewechzehuelen. Déi entspriechend Prozedur gouf lancéiert. Donieft muss d'Gesellschaft mat Strofen a Milliounenhéicht rechnen.

Wéi de Vize-Premier Luigi di Maio gesot huet, wéilt d’Regierung also deenen Entreprisen d’Concessioun fir de Stroossereseau ewechhuelen, déi sech net un d’Reegelen halen, och dem Bedreiwer Autostrade. An engems huet den di Maio och d’Finanzpolitik vum Operateur kritiséiert. De Bedreiwer géif Peagen akasséieren, géif dann awer niddereg Steiere bezuelen ... zu Lëtzebuerg.

D’Mammegesellschaft vun Autostrade Atlantia ass awer net Lëtzebuergesch, schreift um Donneschdeg de Mueren de Journaliste aus dem Wort, den Thierry Labro. Eng Recherche hätt erginn, datt d’Firma net am Handelsregister stéing.

Villes deit drop hin, dass d'Bréck komplett ofgerappt an eng nei gebaut gëtt. Duerch dës Tragedie hunn Honnerte vu Leit keen Daach méi iwwert dem Kapp. Si hunn hir Haiser aus Sécherheetsgrënn musse verloossen, an dat wahrscheinlech fir ëmmer. Iwwer 600 Persoune si betraff, si hu mussen anerwäerts ënnerbruecht ginn. Déi italienesch Regierung huet versprach, dass all dës Leit bis d'Enn vum Joer en neit Doheem kréien.

D’Morandi Bréck ass mat ee vun de wichtegsten Transitpunkte fir op Vakanzendestinatiounen, an ass och eng wichteg Streck fir de Giddertransport. D’Katastroph huet domadder och hire wirtschaftlechen Impakt, schreift déi italienesch Dageszeitung “La Repubblica”. Iwwert d’Morandi Bréck hunn d’Camionen den Hafe ugefuer. Eng 50 Hafe-Bedreiwer hu elo op eng Alternativ missten ëmklammen. D’Camione kënnen net méi den ale Wee fueren, missten also duerch d’Stad fueren. Fir hei den Trafic net weider ze blockéieren, sollen d’Giddertransporter an der Nuecht sinn an den Hafe just déi Zäit op hunn.

Zanter dem Ongléck en Dënschden ass de Wäert vun der Aktie vun Autostrade op der mailännescher Bourse an de Keller gaangen. Ëm 30 Prozent ass déi gefall.

Morandi-Katastroph: De Reportage vum Nadine Gautier (16.8.18


Wat ass geschitt?
De Ponte Morandi, iwwert déi déi véierspureg Autobunn A10 verleeft, ass en Dënschdeg op enger Längt vu ronn 200 Meter agestierzt. Ronn 1,2 Kilometer war d’Konstruktioun laang. Eng Rëtsch Autoe sinn eng 45 Meter mat an d'Déift gerappt ginn, esou déi italienesch Secouristen.

Trageschen Tëschefall zu Genua (14.08.2018)
Eng Autobunnsbréck ass agestierzt an huet e puer Mënsche mat an den Dout gerappt.

No Ongléck: Infrastrukturen am Land musse kontrolléiert ginn (15.08.2018)
Am Nordweste vun Italien ass en Dënschdeg kuerz viru Mëtteg e Stéck vun enger Autobunnsbréck komplett an de Koup gefall.


Op Biller ass ze gesinn, dass op der Plaz, wou d'Bréck an de Koup gefall ass, Haiser stinn a Stroosse verlafen, d'Bréck selwer verleeft queesch duerch d'Stad. D'Rettungsdéngschter fäerten, datt nach aner Deeler vun der Bréck kéinten astierzen. Dowéinst goufen d'Mënschen aus hiren Haiser, déi zum Deel vu Stécker vun der Bréck beschiedegt goufen, evakuéiert.





D'Autoritéite mellen dann och eng Rei Blesséierter, déi an den Haiser ënnert der Bréck waren a vu Stécker getraff goufen, respektiv eng Dampvergëftung hu wéinst dem Feier, dat nom Zesummefall ausgebrach ass.

En Dënschdeg kuerz no 16 Auer huet den EU-Kommissiounspresident Jean-Claude Juncker sech bestierzt iwwert den Tëschefall gewisen an de Familljen a Frënn vun den Affer säi Bäileed ausgeschwat.

© AFP/ANDREA LEONI


Temoignagen
E marokkanesche Camionneur, deen nach esou just konnt bremsen, huet spéider ausgesot, hien hätt e grénge Camion virun him gesinn, stoppen an hannerzeg fueren. Och hien hätt op d'Brems gedréckt, hätt säi Camion verlooss a wier fortgelaf.

© AFP


Mat sengem Auto mat an d'Déift gerappt, gouf och de fréieren italienesche Futtballprofi Davide Capello, deen een Dag méi spéit säi Gléck net beschreiwe kann. Den 33 Joer alen Italiener huet d'Chute mam Auto ouni Verletzung iwwerlieft, obschonns den Auto mat der Bréck zesummen erofgefall ass.

"Et waren Zeene wéi aus engem Film, wéi eng Apokalyps an ech hunn iwwerlieft", sou de fréiere Golkipp vum Liga-Veräin Cagliari. "Ech weess net, wisou mäin Auto net zerdréckt gouf." De Won war tëscht e puer Bëtongsstécker hänke bliwwen an hei konnt aus eegener Kraaft erausklammen an d'Iwwerreschter vun der Bréck eropkloteren.

Vill oppe Froen
Virun allem stellt sech d'Froen: Wéi konnt déi Bréck an e Koup falen? Wien ass responsabel dofir?

D'Regierung huet jiddefalls Mesurë géint de Bedreiwer vun den Autobunnen "Autostrade" annoncéiert. Den italieneschen Transportminister Tininelli fuerdert de Récktrëtt vun der Direktioun. De Kontrakt mat der Firma kéint gekënnegt ginn an et kéint eng Strof vu bis zu 150 Millioune verlaangt ginn.

D’Autostrade per l’Italia weist awer all Responsabilitéit vu sech.

De privaten Operateur vun der Bréck no de Reproche vun der italienescher Regierung erkläert, datt d’Ponte Morandi all dräi Méint kontrolléiert gouf, datt d’Bauaarbechten un der Bréck ëmmer nees iwwerwaacht goufen.

Den italienesche Regierungschef Guiseppe Monte huet bei der Visitt vun der Onglécksplaz betount, dass elo sämtlech Infrastrukturen an Italien géife kontrolléiert ginn. De Vize-Verkéiersminister Edoardo Rixi huet donieft nach annoncéiert, dass de Rescht vun der Bréck géif ofgerappt ginn.




Bannent de leschten 5 Joer sollen an Italien, der “Corriere Della Sera” no 10 Brécken an e Coup gefall sinn. Ënnert anerem well d’Investitioune vu privaten Entreprisen an d’Infrastrukture kleng gehale goufen, an och un de Kontrolle gespuert gouf.

Wéi den däitschen Noriichtesender n-tv mellt, wier d'Bréck, déi 1967 gebaut gouf, a kengem gudden Zoustand gewiescht an och net reegelméisseg esou iwwerpréift ginn, wéi et néideg war. Zum Zäitpunkt vum Ongléck war un der Bréck geschafft ginn. Elo misst gepréift ginn, wie fir deen Entretien zoustänneg war.

E weidere Facteur: Wéi d'Ongléck geschitt ass, huet et zu Genua gereent a gestiermt.