Blesséierter zu ChemnitzEt sinn nees Dausende Rietsextremer duerch d'Stroosse gezunn

Rietsextremer hunn d'Ketten vu Polizisten ëmmer nees opgebrach, fir déi ronn 1'000 Géigendemonstranten a Journalisten unzegräifen.

"Gruss aus Chemnitz" - De Reportage vum Nico Graf



E puer Mënsche goufe blesséiert. 

D’Police zu Chemnitz huet iwwerdeems eege Feeler zouginn. Et hätt ee net mat esou villen Demonstrante gerechent wéi der schlussendlech zu Chemnitz waren. D’Gewerkschaft vun der Police wéisst iwwerdeems mam Fanger op de Personalmanktem. De Staat an déi intern Sécherheet hätten hei versot, heescht et vu Gewerkschaftssäit.

Déi däitsch Justizministesch Barley warnt viru rechtsfräie Raim. Wéi d’Ministesch dem Handelsblatt erkläert huet, dierft net d’Impressiounen entstoen, datt et där Raim géife ginn. Zu Chemnitz wieren déi sächsesch Autoritéite gefuerdert. Leit déi sech dernieft behuelen, misste konsequent verfollegt ginn.

Och den Dag no Iwwergrëffer vun Riets-Gesënnten op Migranten hate sech e Méindeg also nees 5'000 Mënschen bei der Demonstratioun vun der rietser Bierger-Beweegung ''Pro Chemnitz'' getraff. Dat mellt den MDR. Déi riets Zeen hat landeswäit mobiliséiert. D'Police huet iwwerdeems keng Zuele genannt. Rietsextremer hunn d'Ketten vu Polizisten ëmmer nees opgebrach, fir déi ronn 1000 Géigendemonstranten a Journalisten unzegräifen. Fläschen an aner Géigestänn goufe gehäit. D'Police huet mat Waasserkanounen dogéint gehalen. Op d'mannst zwou Persounen goufe bei den Ausernanersetzungen blesséiert. 



Opreegung gëtt et virun allem, well déi Rietsextrem immens aggressiv gewiescht wären, ewéi Zeien an de groussen däitsche Medien temoignéieren. Si hätten zum Beispill Steng gesammelt, ewéi och d'Police bestätegt huet. Iwwerdeems hätten 100 Persoune sech vermummt, wat géint d'Reglement vu Manifestatioune verstéisst. Iwwerdeems wären ëmmer nees rietsextrem an auslännerfeindlech Parole gesonge ginn. An de soziale Medien zirkuléieren Opname vun Rietsen, déi den Hitlergruss maachen an d'Presse menacéieren. D'Géigendemonstratioun huet sech friddlech géint riets Gewalt gewiert.

Ausléiser vun den Evenementer zu Chemnitz war den Doud vun engem 35 Joer alen Däitschen, deen e Sonndeg am fréie Moien erstach gi war. An Tëschenzäit goufen zwee presuméiert Täter aus Syrien an dem Iran festgeholl.

No den Ausernanersetzungen zu Chemnitz huet den Inneminister Horst Seehofer der Police a Sachen seng Ënnerstëtzung zougesot. Weider Detailer goufe keng genannt. Den Innemnister vu Sachsen, de Roland Wöller huet op enger Pressekonferenz vun alarmante Biller geschwat. Et wiere net nëmmen Hooligans aus Sachsen, déi sech mobiliséiert haten, mee och aus anere Bundeslänner. Fir de Minister hunn d’Polizisten mat deene Moyenen, déi se zur Verfügung haten, dat Bescht gemaach.