Stierm an Amerika an an AsienOp d'mannst 15 Doudeger an den USA a 65 op de Philippinnen

D'Zuele vun den Affer duerch den Tropestuerm Florence an duerch de Supertaifun Mangkhut si weider geklommen.

Doudeger duerch Tropestuerm Florence a Supertaifun Mangkhut (16.09.2018)
De Bilan vun den Onwiederen an den USA an op de Philippinnen

D’Zuel vun Doudesaffer duerch de Stuerm Florence un der Ostküst vun den USA ass mëttlerweil op 15 an d'Luucht gaangen. Dat gouf vun den Autoritéiten an de Bundesstaaten North a South Carolina confirméiert.

De Chef vun der Katastrofeschutz-Agence FEMA, de Brock Long, huet via Tëlee gewarnt, dass de Stuerm nach e puer Deeg iwwert der Regioun wäert bleiwen.

De gréisste Problem ass awer net méi de Wand, ma de ville Reen, duerch deen verschidden Däicher riskéieren ze briechen.

Den Tropestuerm Florence féiert jo enorm Waassermasse mat sech a ganz Géigende stinn ënner Waasser. An deem klenge Kaff Swansboro an North Carolina goufen zum Beispill 86 cm Waasser gemooss, dat ass iwwer 20 cm méi wéi de Rekord duerch den Hurrikane Floyd am Joer 1999. Deemools ware 56 Mënschen ëm d’Liewe komm.

Gutt 800.000 Haiser a Geschäfter sinn ouni Stroum. Vill Leit musse mat Helikopter gerett ginn an de Schued un den Infrastrukturen ass enorm.

Op de Philippinnen ass de Bilan nom Passage vum Taifun Mangkhut elo op 65 Doudeger eropgaangen. An der Nuecht op e Méindeg goufe weider Läiche gebuergen, déi vun engem groussen Äerdrutsch begruewe gi waren. De Bilan ass weiderhin och just e provisoreschen, well Dosende Leit nach vermësst ginn.

Uerg getraff gouf och Hongkong, wou e Méindeg dat ëffentlecht Liewe gréisstendeels brooch läit. Schoulen an ëffentlech Administratioune bleiwen zou, fir d’Schied an der Milliounestad ze flécken.

De Stuerm Mangkhut ass iwwert déi philippinnesch Haaptinsel Luzón nordwestlech weidergezunn an huet mëttlerweil Hong Kong a Macao getraff. Un der Südküst vu China ass d'Zuel vun den Doudegen duerch den Taifun op 4 geklommen. De Stuerm huet besonnesch an der Provënz Guangdong grousse Schued hannerlooss. Dräi Mënsche si gestuerwen well se vu Beem erschloe gouf. Eng weider Persoun ass ëm d'Liewe komm, wéi e Gebai an e Koup gefall ass. D'Opraumaarbechten hunn an der Nuecht op e Méindeg ugefaangen. D'Rettungsequippen sichen hirersäits no weideren Affer. Um Méindeg bleiwen op ville Plazen d'Schoulen zou.