No Doud vu Journalist am Hambacher ForstInneminister mat Appell un Aktivisten, d'Bamhaiser fräiwëlleg ze verloossen

Nom trageschen Tëschefall hat den Inneminister vun NRW e Mëttwoch den Owend matgedeelt, datt den Asaz am Bësch bis op weideres gestoppt wär.

© AFP

Nodeems de Policeasaz am Hambacher Forst bis ewell gréisstendeels ouni Gewalt a Blesséierter ofgelaf ass, gouf et um Mëttwoch een Doudegen.

Den Accident ass wärend dem Policeasaz am Baumhausduerf Beechtown geschitt. E Journalist ass hei vun enger Hängebréck ronn 15 Meter* an d'Déift gefall. Der Police no war de Journalist ënnerwee vun engem Bamhaus bei een anert, wéi op enger Hängebréck e puer Brieder gebrach sinn an de Mann an d'Déif gefall ass. Fir de Journalist, dee schonn zanter enger längerer Zäit d'Aktivisten an och de Policeasaz suivéiert huet, sollt all Hëllef ze spéit kommen. Hien ass kuerz nom Accident nach op der Plaz u sengen uerge Blessure gestuerwen.




De Spriecher vun der Police vun Oochen, Paul Kemen, hat nom Accident op enger Pressekonferenz betount, datt et zum Zäitpunkt vum Ongléck an der direkter Ëmgéigend vum Bamhaus keng Moossname vun der Police ginn hätt. Villméi hätt d'Police dobäi hëllefe wëllen, datt eng SD-Kaart vum Verongléckten un e Kolleg um Buedem hätt kënne weidergi ginn. Beim Austausch vun der Späicherkaart wär et dunn zum Accident komm. 

D'Aktivisten hunn dogéint eng aner Versioun vum Accident beschriwwen. Hinnen no war et zu der fataler Chute komm, well de Journalist e Police-Asaz an der Ëmgéigend suivéiere wollt. Iwwert déi tëscht zwee Bamhaiser gespaante Bréck, wollt de Journalist méi no un den Asaz erukommen, sou d'Aktivisten e Mëttwoch den Owend op enger Pressekonferenz.

Asaz gestoppt
Den Asaz vun der Police a vun den RWE-Mataarbechter gouf nom trageschen Tëschefall gestoppt. D'Aktiounsunioun „Hambi bleibt“ hat nom Doud vum Journalist gefuerdert, datt d'Police an d'RWE-Mataarbechter de Bësch direkt solle verloossen an de geféierlechen Asaz solle stoppen. E Mëttwoch den Owend hat den NRW-Inneminister Reul du matgedeelt, datt den Asaz bis op weideres gestoppt gëtt.  




Eng Firma, mat deenen hire Maschinnen d'Police am Hambacher Forst geschafft huet an un d'Bamhaiser komm ass, hat e Mëttwoch den Owend och matgedeelt, datt een d'Maschinnen aus dem Bësch géing zeréckzéien. „Da auch wir mit der Vorgehensweise im Hambacher Forst absolut nicht einverstanden waren und sind und wir auch den Einsatz unserer Bühnen dort nicht weiter rechtfertigen können, haben wir heute beschlossen, dass wir unsere Geräte dort stilllegen“, heescht et an engem Schreiwes vun der Firma. „Wir machen das, obwohl wir es rein rechtlich nicht dürfen, und setzen uns damit hohen Regressansprüchen unseres Kunden aus.“

En Donneschdeg wëll d'Police méiglech Geforequellen ofsécheren, fir weider Accidenter ze verhënneren. D'Evakuatioun vun de Bamhaiser gouf op onbestëmmten Zäit gestoppt. Wéini an ënnert wéi enger Form de Policeasaz weidergeet ass onkloer, an éischter Instanz stéing d'Traueraarbecht am Mëttelpunkt, sou den Inneminister vun Nordrhein-Westfalen. Weider war et och vun him en Donneschdeg de Moien den Appell, datt d'Aktivisten d'Bamhaiser fräiwëlleg solle verloossen, fir datt näischt méi geschitt.

Hannergrënn zum Protest am Hambacher Forst
Zanter dem 13. September probéieren dausende Polizisten am Hambacher Forst bei Oochen, fir d'Leit aus deem Bësch ze kréien, déi sech an de Beem installéiert hunn a mat där Blockad probéieren, ze verhënneren, dass och nach de Rescht vum Bësch zerstéiert gëtt.

© AFP


Mëtt Oktober soll d'Halschent vun de ronn 200 Hektar Bësch, déi nom enormen Ofholzen an de leschte Jore vun den 4.100 Hektar nach iwwreg bliwwe sinn, ofgeholzt ginn. Well RWE Proprietär vum Bësch zu Hambach ass, dierf d'Entreprise dëst och legal maachen. Fir den Energie-Bedarf an Nordrhein-Westfalen ze garantéieren, misst d'Minn vergréissert ginn, sou RWE. Klimaaktivisten, Ëmweltschützer an och déi Gréng sinn do anerer Meenung.

Zanter 2012 ass den Hambacher Forst vun Aktiviste besat. Si probéieren d'Ofholze vum Bësch, deen iwwer 12.000 Joer al ass an an deem vill seelen Déieren an och Planzenaarte liewen, nach ze verhënneren. Iwwert déi lescht 6 Joer hunn Aktivisten am Hambacher Forst gelieft a sech do installéiert. Iwwer 50 Bamhaiser an deels iwwer 20 Meter Héicht goufen opgeriicht a ganz Dierfer sinn entstanen.

© AFP


Bis déi lescht Woch hunn d'Autoritéiten d'Besetzung vum Bësch toleréiert. Aus Brandschutzgrënn a wéinst feelende Geneemegungen, fir de Bau vun de Bamhaiser, hat de Logementsministère déi lescht Woch dunn decidéiert, datt de Bësch direkt soll geraumt ginn.

© AFP


Nieft RWE-Mataarbechter sinn zanter dem leschten Donneschdeg dausende Polizisten op der Plaz am Asaz, fir d'Aktivisten aus dem Bësch ze huelen an ze verhënneren, datt nei Leit an de Bësch kommen. Mat hëllef vu schwéiere Maschinne sinn an de leschten Deeg Beem ëmgeseet, Barrikaden ofmontéiert an d'Aktivisten aus de Beem an de Bamhaiser geraumt an deelweis festgeholl ginn. Vun den iwwer 50 Bamhaiser goufen der bis e Mëttwoch 39 geraumt an der 30 zerstéiert.

© AFP





500.000 Ënnerschrëft gesammelt
D'Aktivisten am Bësch kréie vill Support vu Baussen. Ëmmer nees kënnt et op der Plaz zu Demonstratiounen. E Sonndeg waren iwwer 4.000 Leit zesumme komm, fir géint den Asaz vun der Police ze protestéieren. Kritik um Police-Asaz kënnt och vun Organisatioune wéi dem BUND, Campact oder Greenpeace. De Protest ass bis ewell gréisstendeels friddlech Verlaf an d'Leit op de Bamhaiser loosse sech ouni Asaz vu Gewalt an awer mat passivem Widderstand festhuelen.




Mat enger Petitioun, wou iwwer 500.000 Ënnerschrëfte gesammelt goufen, wëllen Ëmweltschützer d'NRW-Landesregierung dozou bréngen, déi geplangten Ofholzung am Hambacher Forst ze stoppen. Déi gesammelt Ënnerschrëfte goufen en Donneschdeg iwwerreecht an d'Ëmweltministesch Ursula Heinen-Esser huet se entgéint geholl.

Andréck aus dem Hambacher Forst. Klickt Iech duerch d'Fotoen.


FOTOGALERIE: Andréck aus dem Hambacher Forst

Wéi et an Däitschland mam Ofbau vun der Kuel weider geet, ass nach net gewosst. Bis Enn 2018 soll d'Kuelekommissioun, wou ënnert anerem Politiker, Leit aus der Industrie a Klimaschützer dra sinn, sech op eng Strategie eenegen, wéi den Austiig, dee schonn decidéiert gouf, vun der Stroumversuergung mat Kuel soll ausgesinn. 

Zanter enger Zäit stinn d'Kuelekraaftwierker an der Kritik. Kuel ass nämlech ee vun den Haaptverursaacher vun CO2 an Däitschland an huet och eng ganz schlecht Energiebilanz.

*Aus wéi enger Héicht de Mann genee gefall ass, ass net gewosst. Der Police no waren et ca. 15 Meter an den Aktivisten no ca. 20-25 Meter.