IranOp d'mannst 29 Doudeger no Attack op Militärparad

Op d'mannst 29 Doudeger gouf et e Samschdeg de Moie bei enger ganz geziilter Attack op eng Militärparad am Südweste vum Iran.

© AFP

E Porte-parole vum lokale Gouverneur huet matgedeelt, dass et sech dobäi ëm iranesch Zaldoten, ee Journalist an och vill Zivilisten handelt. 57 Leit goufen donieft blesséiert, deels schwéier, dofir kéint d'Zuel vun den Affer nach klammen.

Et waren am ganzen 4 Männer, déi d'Parad wärend 10 Minutten attackéiert hunn, 2 dovunner goufen erschoss, déi aner 2 konnte verhaft ginn. Den iranesche Staatsfernseh huet direkt vun enger Terrorattack vum islamesche Staat geschwat. Sunnitesch Separatisten, déi dem IS no stinn, hunn d'Dot awer mëttlerweil revendiquéiert.

Wann et stëmmt, dass den IS hannert dëser Dot stécht, da wär et schonn déi zweet grouss Attack vun der Terrormiliz am Iran.