Merkel gëtt Feeler zouHans-Georg Maaßen gëtt Conseiller am Inneministère, Oppositioun onzefridden

D'Koalitioun ass sech e Sonndeg den Owend eens ginn. Den ëmstriddene Maaßen soll Conseiller am Inneministère ginn.

© Odd Andersen / AFP

Causa Hans-Georg Maaßen - Reportage vum Pierre Jans



Et ass e Sonndeg am Fong de ganzen Dag roueg bliwwen an der Causa Maaßen. De President vum däitsche Verfassungsschutz vu bis elo soll an Zukunft am Inneministère als Conseiller fir europäesch an international Dossieren zoustänneg sinn.

Deemno ass den Hans-Georg Maaßen an Zukunft Chef de Service, a kritt keng Augmentatioun vun der Pai. Uganks war gesot ginn, de fréiere Chef vum Verfassungsschutz géif Staatssekretär ginn. Déi fënnef aktuell Staatssekretären bleiwen op hire Posten, sou nach den Horst Seehofer.

Dorobber hätte sech d'Parteicheffe vun der grousser Koalitioun gëeenegt, huet e Sonndeg den Owend den däitschen Inneminister Horst Seehofer no Berodunge mat der Bundeskanzlerin Angela Merkel an der SPD-Cheffin Andrea Nahles zu Berlin bekannt ginn.

Virun allem d'Parteicheffin vun der SPD Andrea Nahles war frou iwwer dës Entscheedung. Si war an den eegene Reie ferm kritiséiert ginn, wéi de Maaßen op de Poste vum Staatssekretär befërdert hätt solle ginn. Erliichterung also beim Andrea Nahles. Si huet dem Angela Merkel an dem Horst Seehofer Merci gesot, dass si d'Ureegung an d'Bedenke vun hir consideréiert hunn.

Den Horst Seehofer hat sech déi lescht Deeg hannert de Maaßen gestallt. Hie géing net e Mataarbechter entloossen, well d'ëffentlech oder d'politesch Meenung sech géint hie gedréint hätt. Hien wär e kompetente Mann.

De Chef vum Bundesverfassungsschutz gouf jo no ganz ëmstriddenen Aussoen als Staatssekretär am Inneministère nominéiert, ma war domadder d'Leeder eropgefall, wat net just an der Politik ma och an der breeder Ëffentlechkeet fir vill negativ Schlagzeile gesuergt huet.

De Risk, dass déi grouss Koalitioun bei eisen däitschen Noper auserneebrécht, schéngt deemno vum Dësch.

Merkel gëtt Feeler zou

E Méindeg de Moien huet dunn och d'Kanzlerin op déi nei Léisung reagéiert, an engem kuerze Statement mat vill Eegekritik. Si hätt sech am Zesummenhang mat der Decisioun vu leschter Woch ze vill op d'Ofleef am Inneministère fokusséiert, awer ze wéineg dat beduecht, wat d'Leit zu Recht beweegt, wa se vun enger Befërderung héieren. Dass dat geschéie konnt, bedauert d'Bundeskanzlerin.

Elo hätt een eng Léisung fonnt, déi raisonnabel a besser ze vermëttele wär. Den Hans-Georg Maaßen géif weder promouvéiert ginn, nach méi verdéngen. Genee virun engem Joer gouf an Däitschland gewielt, d'Koalitiounsverhandlunge ware méi ewéi zéi, an awer hätt Regierung schonn sou munch Problemer geléist, fënnt d'Angela Merkel. Op ville Plazen hätt ee sech déi lescht Méint och ze vill mat sech selwer beschäftegt. Dat misst sech änneren an dofir hätt een e Sonndeg net just eng Entscheedung iwwert déi berufflech Zukunft vum Hans-Georg Maaßen getraff, ma et hätt een och decidéiert, dass een den nächste Méindeg e Koalitiounsausschoss mécht.

Nei Motivatioun no enger Kris, also bei der Kanzlerin. Staark Kritik awer vun der Oppositioun. Déi ganz Opreegung ronderëm den neie Poste vum Maaßen wär Kouhandel.


Schaarf Kritik vun der Oppositioun
Déi Lénk, FDP an déi Gréng hunn den Accord vun der Koalitiounsspëtzt hefteg kritiséiert. De Chef vun déi Lénk Bernd Riexinger huet op Twitter geschriwwen, dass d'Angela Merkel an d'Andrea Nahles wuel schwéier vu Begrëff wieren, dësen Hin an Hier géif kee Mënsch verstoen. Vum FDP-Chef Christian Lindner heescht et, dass de Poste vun enger Zort Alibi-Direkter geschaf gouf, enger Persoun déi wuel eng héich Positioun huet, awer kee gréisseren Afloss. D'Fraktiounscheffin vun déi Gréng, Katrin Göring-Eckhardt ass der Meenung, dass elo nei Problemer entstinn, well den Hans-Georg Maaßen trotzdeem bleift.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.