Policeasaz zu KölnGeiselnam beim "Hauptbahnhof" ass eriwwer,Täter gouf reaniméiert

Nodeems e Méindeg op der Haaptgare zu Köln eng Geiselnam bluddeg op en Enn goung, iwwerpréift d'Police e méiglechen terroristeschen Hannergrond.

© AFP

Zu Köln um "Breslauer Platz", bei der Gare, ass et um Méindeg an der Mëttesstonn zu enger Geiselnam an enger Apdikt komm. D'Geisel gouf liicht blesséiert.

Et ware ganz vill Polizisten op der Plaz. E Méindeg géint 15.00 Auer hat d'Police du bekannt ginn, dass d'Geiselnam eriwwer wier an datt den Täter festgeholl gouf. Hie gouf beim Zougrëff vun der Police uerg blesséiert an huet misse reaniméiert ginn. Säin Zoustand soll kritesch sinn.

Däitsch Medien hate gemellt, et wieren och Schëss gefall. D'Police huet dëst awer net confirméiert.

E Méindeg den Owend huet d'Police éischt Informatiounen zum Oflaf vun der Geiselnam matgedeelt. De presuméierten Täter hat an engem Restaurant am Hauptbahnhof e Molotowcocktail ugefaangen. Doduerch gouf ee 14 Joer alt Meedche blesséiert, sou eng Policespriecherin op der Pressekonferenz. De presuméierten Täter ass duerno an eng Apdikt geflücht an huet do eng Fra als Geisel geholl. De Mann hat e puer Gaskartuschen dobäi an huet sech an engem hënneschten Deel vum Geschäft verschanzt. Wéi dunn e Spezial-Kommando an d'Apdikt eragaangen ass, huet de Mann der Geisel massiv gedréit a wollt se ufänken. D'Beamte konnten dëst Verhënneren an d'Fra gouf a Sécherheet bruecht. Well de presuméierten Täter eng Waff an der Hand hat, hunn d'Beamten op de Mann geschoss, deen dobäi liewensgeféierlech blesséiert gouf.

D'Police schléisst een terroristeschen Hannergrond net aus. Wéi de presuméierten Täter festgeholl ginn ass, soll hien der Police no gesot hunn, datt hie Member vum IS wär. Beim Mann kéint et sech ëm ee 55 Joer ale Syrer handelen, dee bis 2021 am Däitschland gedult war. Dokumenter mat dësen Infoe goufen nämlech beim Mann fonnt.