KrimExplosioun a Schoul, 20 Doudeger, Täter erschéisst sech selwer

Den Täter, e Schüler vun 18 Joer, huet eng Bomm gezünt a sech dono selwer erschoss, esou d'Autoritéite vun der Krim.

© Google Maps

20 Doudeger, dat ass deen dramatesche Bilan no där brutaler Attack e Mëttwoch an enger Schoul op der Hallefinsel Krim. D'Regierung huet um Dag dono d'Lëscht mat den Nimm vun deenen 19 Affer public gemaach, déi vum Täter nach net.

15 Doudesaffer, dorënner den Täter, ware Schüler, 6 vun hinne waren nach mannerjäreg. Donieft koumen och fënnef Mataarbechter vun der Beruffsschoul ëm d'Liewen. E Schüler vun 18 Joer hat an der Kantin vun der Schoul eng Bomm, déi mat Metall gefëllt war, gezünt an huet se op seng Matschüler geheit. Dono huet den Täter sech selwer erschoss.

Am ganze goufe 50 Persoune blesséiert, eng ganz Partie dovu schwéier. Uganks waren d'Autoritéite vun engem Terrorattentat ausgaangen. Nodeems den Täter als Schüler identifizéiert war, gëtt nach just wéinst Mord enquêtéiert.