Affär KhashoggiGrujeleg Detailer vum Mord ... wa se da stëmmen

De regime-kriteschen saudi-arabesche Journalist soll jo am saudesche Konsulat zu Istanbul ëmbruecht gi sinn.

© AFP
Grad wéi e sëllechen aner Finanzministeren an héichgestallte Leit aus der Ekonomie reest och den US-Finanzminister net op d'Investisseurskonferenz a Saudi-Arabien.Hannergrond ass d'Affär Kashoggi.

De regime-kritesche saudi-arabesche Journalist war an d'saudescht Konsulat zu Istanbul gaangen a gëtt zënterhier vermësst.

Allgemeng geet een dervunner aus, dass de Mann vum saudesche Geheimdéngscht gefoltert a liquidéiert gouf. Verschidde Medien hunn antëscht och scho grujeleg Detailer vum Mord publizéiert. E soll 7 Minutte gedauert hunn. Als éischt wier de Kashoggi gefoltert ginn, du mat enger Flëssegkeet roueg gestallt ginn an duerno, nach lieweg, zerstéckelt a gekäppt ginn.

Dës a vill weider Detailer, déi grujeleg sinn, hunn international Medie relatéiert, ob se wouer sinn, bleift ze klären.

De Generalkonsul vu Saudi-Arabien zu Istanbul, Mohammed al-Otabi, soll och gesot hunn: "Maacht dat dobaussen, dir maacht mir Problemer." En Dënschdeg ass den Otaibi vun Istanbul op Riad geflunn.

USA: Drock op Trump

Och den US-President Trump geréit an der Affär ëm de saudesche Journalist Jamal Khashoggi, vun deem nach ëmmer all Spur feelt, ënner Drock.

Eelef Senateure vun den oppositionellen Demokraten hunn e Mëttwoch an engem oppene Bréif vum Donald Trump Detailer gefuerdert, iwwert eventuell finanziell Relatiounen tëscht der Trump-Organisatioun an dem Kinnekräich Saudi-Arabien. Et sinn dem US-President seng Filssen, déi dem Trump säi Firmenimperium aktuell geréieren. Et géifen Indicen iwwer finanziell Interessekonflikter virleien, sou d'Senateuren. Den Donald Trump hat en Dënschdeg op Twitter geschriwwen, dass hien absolut keng finanziell Intressien a Saudi-Arabien hätt.

D'USA wëlle vun den tierkeschen Autoritéiten dann och Videoopname kréien aus dem saudiarabesche Konsulat zu Istanbul. Op deene Biller géing et staark Beweiser ginn, datt de saudiarabesche Journalist Jamal Khaschoggi do ermort gi wier. US-Medieberichter no wier hie vu saudiarabeschen Agenten, déi Lienen hu mam Kinnekshaus, jo a Stécker geschnidden an/oder gekäppt ginn. D’USA, déi staark ekonomesch Lienen mat Saudi-Arabien hunn, stinn ënner Drock, fir Liicht an déi Affär ze bréngen.

Tierkesch Enquêteure hunn iwwerdeems en Donneschdeg d'Residenz vum saudiarabesche Konsul zu Istanbul a fir d'zweet Kéier och d'Konsulat selwer duerchsicht. Donieft huet d'Washington Post dem Khashoggi säi leschten Artikel publizéiert, deen hie virun e puer Woche soll geschriwwen hunn. An dësem Artikel huet de saudesche Journalist d'Bedeitung vun enger fräier Presse fir déi arabesch Welt ervirgestrach.