Affär KhashoggiTrump geet dovunner aus, dass den Jamal Khashoggi dout ass

Et géif ganz dono ausgesinn, sou den Donald Trump en Donneschdeg a senger Äntwert op eng Fro vun engem Reporter. D'Reaktioun misst ganz strikt sinn.

De regime-kritesche saudiarabesche Journalist war Ugangs Oktober am saudesche Konsulat zu Istanbul a gëtt zënter hier vermësst. Allgemeng geet een dervunner aus, dass de Mann vum saudesche Geheimdéngscht gefoltert a liquidéiert gouf. Et heescht, d'Tierkei hätt Audio-Opnamen, déi dëst beleeën.

Antëscht geet och den US-President Trump dervunner aus, dass de Kashoggy dout ass. Hien huet mat eeschte Konsequenze gedreet, sollt de saudesche Regime an dee Mord verwéckelt sinn. Der New York Times no soll Riad am Gaange sinn, ee Sënnebock ze sichen.

D'Zeitung schreift, dass Riad wëlles huet, ze behaapten, dass de Krounprënz Salman wuel den Uerder ginn huet, fir den Interrogatoire vum Khashoggy. Ee Generol hätt deen Uerder awer falsch verstanen, respektiv wier op eegen Initiative driwwer erausgaangen, mat Folter a Mord. Déi tierkesch Autoritéite sichen an de Bëscher ronderëm Istanbul no der Läich vum saudiarabesche Journalist Jamal Khaschoggi.