Schëffsverkéier ageschränktPeegel vum Rhäin sou déif, wéi zanter Joerzéngten net méi

Duerch de vill ze wéinege Reen an de leschte Méint, fält de Peegel vum Rhein ëmmer weider. Dëst huet staark Auswierkungen op de Schëffsverkéier.

© AFP
Déi wichtegste Waasserstrooss an ganz Däitschland, de Rhäin, dréchent aus. Grond dofir ass, dass et zanter Woche guer net, respektiv net genuch gereent huet. Den Ament ginn op ville Plaze vun Düsseldorf bis Köln sou niddreg  Peegele gemooss, wéi nach ni virdrun.

Zu Köln huet de Peegel vum Rhäin e Freideg eng Rekord-Déift vu 77 Zentimeter erreecht. Nach soll den niddregste Punkt net erreecht gi sinn. D'Wasserstraßen- und Schifffahrtsverwaltung des Bundes rechent fir en Dënschdeg mat engem Peegel vu 67 Zentimeter. Den ale Rekord zu Köln war aus dem Joer 2003 mat 81 Zentimeter. Normalerweis ass de Floss iwwer 3 Meter déif.

Duerch dat wéinegt Waasser am Rhäin ass de Schëffsverkéier staark ageschränkt an d'Schëffer kënnen den Ament nëmmen nach zu 30 Prozent beluede ginn, sou e Spriecher vun der Waasserschutz-Police zu Duisburg. Wéinst der gerénger Fracht mussen d'Schëffer méi dacks fueren an esou kënnt et ëmmer nees zu Stau um Waasser. Vill Laaschte mussen och op d'Strooss respektiv d'Schinne verluecht ginn.

D'Konsequenzen dovunner waren an de leschten Deeg an NRW ze spieren. Eenzel Industrie mussen hir Produktioun bremsen an Aarbechtsplaze sinn dofir mëttlerweil a Gefor. Zu Köln konnten da beispillsweis och Tankstellen net méi beliwwert ginn, sou datt d'Chauffeuren deels kee Bensin oder Diesel méi kritt hunn.

Duerch den niddrege Peegel ass an de leschte Wochen och ëmmer méi Dréck um Ufer zum Virschäi komm. Zu Köln goufen e Freideg bannent nëmmen 2 Stonnen iwwer 2,5 Tonnen Offall aus dem Floss geholl. Ënnert anerem Vëloen, Akafsweenercher, Regaler, Pottoen, Schëlter, Ventilatore ware mat dobäi.