Midterm ElectionsGëtt dem Trump seng Muecht beschnidden?

An der Nuecht op e Mëttwoch gëtt an den USA gewielt. Mir halen Iech iwwer all Decisioun um Lafenden op RTL.lu a mat engem Live-Coverage op RTL Today.

Um Dënschdeg den Owend an an der Nuecht op e Mëttwoch sinn an de Vereenegte Staate vun Amerika d'Midterm Elections, konkret heescht dat, datt d'Representantenhaus komplett nei gewielt gëtt an de Senat zu engem Drëttel.

Op RTL.lu an nach méi op RTL Today hale mir Iech um Lafenden! Um fréie Mëttwoch de Moien dierft mat konkrete Resultater ze rechne sinn.

Hei geet et bei de LIVE-COVERAGE op RTL Today.

D'Midterm Elections heeschen esou, well si an der Hallschent vum Mandat vun engem US-President sinn. Si sinn also e wichtege Stëmmungsbarometer fir déi presidial Politik. Ma déi Wale sinn nach méi, well de Kongress, dat sinn d'Representantenhaus an de Senat, hunn e Wuert an der Politik vum President matzeschwätzen. Et hänkt also vill dovun of, wien do d'Majoritéit huet.

Wat genee sinn d'Midterms?



Den Ament si béid Haiser an den Hänn vun de Republikaner, deemno kann den Donald Trump seng Politik ouni Blockaden ëmsetzen, z.B. seng Steierreform. Wat d'Representantenhaus ugeet, esou hunn d'Demokraten hei gutt Chancen, fir nees eng Majoritéit zesummenzekréien, op jiddwer Fall wann et de Sondagë vum leschte Mount nogeet, déi vun enger sougenannter "blue wave" also enger "bloer Well" ausginn.

REPRÄSENTANTENHAUS


24 zousätzlech Mandater bräichten d'Demokraten, fir d'Majoritéit am Representantenhaus ze kréien. An där Institutioun mussen déi 435 Sëtz nei besat ginn, dat fir ee Mandat vun 2 Joer. Den Ament hunn d'Republikaner do 235 Vertrieder, d'Demokraten der 193 a 7 Poste sinn eidel. Sollten d'Demokraten hei méi Käpp um Enn sëtzen hunn, da kënne si grouss Projete vum Donald Trump blockéieren, zum Beispill kéinte si dann d'Sue fir de Bau vun der Mauer un der mexikanescher Grenz refuséieren.

SENAT


Eriwwer da bei de Senat, deen aus am Ganzen 100 Sëtz besteet, all Bundesstaat huet der also 2. Hei muss awer just een Drëttel vun de Sëtz ersat ginn, 35 am Ganzen, dat fir eng Dauer vu 6 Joer. Datt d'Demokraten do d'Majoritéit kréien, ass éischter onwahrscheinlech, well si schonn eleng 26 Poste verdeedege mussen (si brauchen der 28 fir eng Majoritéit), woubäi d'Republikaner der just 9 musse verdeedegen.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.