Messerattack zu MelbourneEen Doudesaffer an 2 Blesséierter, Täter am Spidol gestuerwen

Wärend enger Messerattack am Zentrum vu Melbourne e Freideg de Moien sinn 2 Mënschen ëm d'Liewe komm, dorënner den Täter an 2 Persoune goufe blesséiert.

© AFP

Eng australesch Noriichtenagence huet eng Foto publizéiert, op där eng Läich ze gesinn ass.

Wéi et vun der Police heescht, ware si op en Autosbrand geruff ginn. Den Täter soll säin Auto a Brand gestach hunn. Dono ass hie mat engem Messer op d'Police duergaangen. Den Tëschefall ass an engem Geschäftsquartier zu Melbourne geschitt, mëttes géint 16.20 Auer Lokalzäit, wéi vill Leit sech op de Wee fir heem gemaach hunn.

Op Videoen an de sozialen Netzwierker ass ze gesinn, wéi ee Mann mat engem Messer op d'Beamten duergeet, bis si op eemol op hie schéissen. De Mann gouf an engem kriteschen Zoustand an d'Spidol ageliwwert, ass do awer kuerz drop gestuerwen.

Zwou Persoune solle blesséiert gi sinn, eng dovun zimlech uerg um Hals. Eng Persoun ass ëm d'Liewe komm sinn. Déi genee Ëmstänn vun der Dot mussen elo gekläert ginn. D'Police huet en Appell un d'Populatioun gemaach, dee betraffene Quartier virleefeg ze evitéieren, och wann een zu dësem Zäitpunkt no kenge weidere suspekte Persoune géif sichen.

Den Ament geet d'Police vun engem terroristeschem Hannergrond aus, och wann et nach keng Indicen dofir ginn.

Opgepasst, dëse Video enthält Gewaltzeenen!