DäitschlandCDU: Kramp-Karrenbauer nei Presidentin, Ziemiak neie Generalsekretär

Eng Ära geet op en Enn: D'CDU huet e Freideg op engem Parteidag zu Hamburg d'Nofolgerin vum Angela Merkel gesicht an eng nei Parteipresidentin gewielt.

CDU: Annegret Kramp-Karrenbauer nei Presidentin (07.12.2018)
Eng Ära geet op en Enn: D'CDU huet e Freideg op engem Parteidag zu Hamburg d'Nofolgerin vum Angela Merkel gesicht an eng nei Parteipresidentin gewielt.

D'Angela Merkel huet no iwwer 18 Joer net méi fir de Poste vun der Parteipresidentin kandidéiert.

Intresséiert un hirer Successioun waren d'CDU-Generalsekretärin Annegret Kramp-Karrenbauer, de fréiere Fraktiounschef vun der Unioun, Friederich Merz, an de Gesondheetsminister Jens Spahn. De leschten Ëmfroen no hat sech ee Kapp-u-Kapp-Rennen tëscht der Annegret Kramp-Karrenbauer an dem Friederich Merz ofgezeechent ... an esou sollt et dann och kommen!



Fir den Optakt vum Parteidag konnten d'Delegéiert allerdéngs nach weider Personalpropositioune maachen. Direkt um Ufank huet d'Angela Merkel als Nach-CDU-Presidentin hir lescht Ried gehalen. Duerno hu sech déi méiglech Nofolger den Delegéierte virgestallt. Gewielt war deen, deen eng Majoritéit vun de Stëmme kritt.

© AFP


Am 1. Tour waren 999 Stëmmen ofgi ginn, 0 ongëlteger an 0 Enthalungen.

Fir d'Annegret Kramp-Karrenbauer ware 450 Stëmmen (ronn 45%), fir de Friederich Merz 392 Stëmmen (ronn 39%) a fir de Jens Spahn 157 Stëmmen (ronn 15%).

Domat stoungen d'Annegret Kramp-Karrenbauer an de Friederich Merz wéi erwaart am zweeten Tour.

Am 2. Tour goufen op en Neits 999 Stëmmen ofginn, déi all gëlteg waren. Mat dëser Verdeelung:

482 Stëmme fir de Friederich Merz (48,25 %)
517 Stëmme fir d'Annegret Kramp-Karrenbauer (51,75 %)

Ganz knapp gouf domat d'Annegret Kramp-Karrenbauer zu der neier CDU-Presidentin an domat zur Nofolgerin vum Angela Merkel gewielt.

Et goung am Vott natierlech och drëms, wien herno Kanzlerin oder Kanzler gëtt, respektiv fir dee Poste kandidéiere wäert.



De President vun der CDU-Jugendorganisatioun Paul Ziemiak gëtt denieft Generalsekretär ginn. An enger Ried um CDU-Parteidag zu Hamburg huet déi nei Presidentin d'Delegéiert gebieden, fir den Ziemiak ze stëmmen. Hie wier mat sengem Profil gëeegent, den ustoenden Erneierungsprozess vun der Partei virunzedreiwen.

D'Delegéierten hien um Samschdeg de Moie mat 62.8% vun de Stëmme gewielt.

De Paul Ziemak soll ee gudde Frënd vum däitsche Gesondheetsminister Jens Spahn sinn, deen der Annegret Kramp-Karrenbauer an der Course ëm d'CDU-Presidence däitlech ënnerleeë war.

Mat dësem Schrëtt kéint si souwuel déi Jonk an der Partei wéi och eng ganz Partie konservativ Kritiker vun der Angela Merkel hirer Politik vu bis elo, uschwätzen.

Reportage vum Nico Graf (virum Vott)

CDU zu Hamburg - De Reportage vum Nico Graf



Et muss een dat mat traditionell-konservativen CDU-An kucken, fir ze verstoen, wéi e Choix d'CDU-Delegéiert e Freideg am Nomëtten zu Hamburg hunn. Et ass net einfach: eng Fra, e Schwulen, e Räichen. Deen Trio weist, wéi modern d'Partei ginn ass. Ob jiddereen an där Partei dat gär huet, dat ass eng ganz aner Fro, well d'Merkel krut an de leschte Jore jo dacks reprochéiert, si hätt d'CDU sozial-demokratiséiert.

Egal. Déi 3 do konkurréieren drëm, d'Merkel un der Spëtzt vun der Partei ofzeléisen a keen ass dupe: et geet och drëms, wien herno Kanzlerin oder Kanzler gëtt.

A schonns briechen an der CDU all déi al Wonnen op, déi eben ni richteg verheelt sinn. De Bundestagspresident Wolfgang Schäuble sprécht sech fir säi Frënd Friedrich Merz aus. Kee Wonner, datt d'Rechemaschinn Schäuble dat mécht: éischtens well den Economiefachmann Merz him am Denken nosteet an zweetens well de Schäuble sech domat un der Merkel räche kann, déi hien an der Vergaangenheet e pur Mol iwwerdubbert huet, am Reen stoe gelooss huet oder e net gelooss huet, dat ze ginn, wat hien esou gär gi wier, notamment Bundespräsident. Do goufen an de leschten Deeg ganz vill al Rechnungen opgemaach, nach aus Helmut-Kohl-Spendeskandalzäiten.

A knapps hat de Schäuble säi Favorit Merz genannt, schonn huet e Saarlänner seng Saarlännerin als Favoritin genannt: de Wirtschaftsminister a Merkel-Intimus Peter Altmaier ass net iwwerraschend der Annegret Kramp-Karrenbauer zur Säit gesprongen. D'Annegret Kramp-Karrenbauer, déi och als der Merkel hir Favoritin an als zukünfteg Kanzlerin gëllt.

Wéi et herno ausgeet, ass total ongewëss. Sécher ass just, datt den éiergäizege Jens Spahn géint déi aner zwee keng Chance huet. Wat soss op deem Kongress geschitt – do spillen Elementer mat, déi schwéier kalkuléierbar sinn. D'Meenungssondagen aus de leschte Wochen haten do kee Sënn. Et kënnt nämlech nëmmen op d'Delegéiert un. An en Drëttel vun deene si Fraen. Et gëtt geduecht, datt déi d'Madame Annegret Kramp-Karrenbauer wielen. 296 Delegéiert kommen aus Nord-Rheinwestfalen – wou de Merz an de Spahn hierkommen. Wéi wierkt sech dat aus? Wa sech dee Vott opspléckt, kéint et emol sinn, datt d'Annegret Kramp-Karrenbauer dowéinst am éischten Tour gewënnt.

Inhaltlech sinn d'Kandidaten net esou richteg wäit auserneen. Allen dräi wëlle se méi konservativ sinn wéi d'Merkel, iergendwéi allen dräi géint der Merkel hir Flüchtlinsgpolitik; d' AKK awer – als Saarlännerin – méi sozial fir déi kleng Leit, de Merz wirtschaftsliberal, natierlech, de Spahn decidéiert konservativ. An allen 3 si se dat, demonstrativ konservativ fir – sollte se an d'Kanzleramt packen – fir der AFD d'Wieler ofzehuelen. Déi AFD ass den onheemlechen Éieregaascht um Freideg zu Hamburg.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.