VIDEO A FOTOEN - Gilets Jaunes a FrankräichRonn 1.400 Persoune festgeholl, iwwer 130 Persoune blesséiert

Bei de Protester vun de "Gilets jaunes" sinn e Samschdeg eleng zu Paräis iwwer 700 Mënsche festgeholl ginn.

E Samschdeg waren d'Gilets Jaunes nees op de Stroossen (08.12.2018)
Iwwer 1.000 Persoune goufen a Frankräich e Samschdeg festgeholl, 55 Leit goufe blesséiert, 1 ass a Liewensgefor.

Op d'mannst 135 Mënsche goufe bei de Krawallen e Samschdeg a Frankräich blesséiert, dorënner 17 Polizisten. Am Kader vun de Protester vun de sougenannte "Gilets jaunes" goufe ronn 1.400 Persoune festgeholl - déi meescht Gewalt gouf et op en Neits an der Haaptstad Paräis. Do hunn Demonstranten Autoen a Brand gestach, Fënsteren ageschloen a sech mat der Police ugeluecht. D'Beamten hunn Tréinegas agesat.

Am ganze Land ware ronn 125.000 Demonstranten op de Stroossen.

De Protest riicht sech antëscht net nëmme méi géint déi geplangte Steierhausse op Sprit an Diesel, déi d'Regierung op Äis geluecht huet, mä och géint de franséische President a seng Reformpolitik.

De franséische President Emmanuel Macron geréit iwwerdeems ëmmer méi ënner Drock. Um Méindeg den Owend um 20 Auer adresséiert hie sech an enger Usprooch un d'Fransousen. Hie wëll eng Serie u Mesure presentéieren, fir de Mouvement vun de Gilets Jaunes ze berouegen.

Chronik vum Samschdeg
Et wier en aussergewéinlecht Sécherheetskonzept a Kraaft, sot de Premier Edouard Philippe no enger éischter Entrevue mam Inneminister an de Sécherheetsautoritéiten. Zil wier et, friddlech Demonstrante vun de Leit, déi randaléieren, ze trennen.

Ënnert anerem op de Champs Elysées hate sech Dausende Leit versammelt. Autoe goufen a Brand gestach, Leit hu mat Knupperten a mat aneren Objeten op d'Sécherheetsautoritéite gehäit. D'Police ass mat Tréinegas géint d'Manifestante virgaangen. Géint 18 Auer hat sech d'Situatioun a Frankräich lues a lues entspaant.

Et war déi éischte Kéier, datt och gepanzert Gefierer zu Paräis fir d'Protester vun de Gilets jaunes agesat goufen.



Zu Longeville-lès-Saint-Avold an der Moselle hunn e Samschdeg eng 300 Leit demonstréiert, 200 CRSe waren op der Plaz.



Déi franséisch Regierung hat sech op dat Schlëmmst preparéiert: D'Police gouf massiv mobiliséiert, fir Eskalatiounen ze verhënneren. Eleng zu Paräis waren 8.000 Polizisten am Asaz. Am ganze Land waren et der méi wéi 89.000.

© AFP


Schonn ier d'Protester ugefaangen hunn, goufen zu Paräis Leit festgeholl. Et géif sech ëm Suspekter handelen, déi op Paräis gereest wieren, heescht et aus Policekreesser. Si solle Masken ugehat hunn an Schleideren, fir mat Steng ze schéissen, an Hummere bei sech gehat hunn.

Op de sozialen Netzwierker wéi Facebook hate sech nei Gruppe forméiert, déi zu weidere Protestaktiounen opgeruff hunn. Bei zwou dovunner haten iwwer 3.500 Leit hir Participatioun zougesot, iwwer 20.000 waren intresséiert. Bei de Protester maachen och ëmmer méi Leit aus ënnerschiddleche gesellschaftlech Schichte mat.

Vill Geschäfter an Touristenattraktioune bloufen e Samschdeg zou a Futtballsmatcher goufe reportéiert, dorënner och de Futtballsmatch an der Ligue1 tëscht Paräis a Montpellier, deen e Samschdeg de Mëtteg um 16 Auer sollt am Parc des Princes ugepaff ginn.

Betraff war och d'Aktioun Téléthon, wärend där Sue fir d'Recherche gesammelt ginn. U sech sollt live vun der Place de la Concorde aus iwwerdroe ginn. France Televisions huet decidéiert, wärend deenen 30 Stonnen aus de Studioen ze senden. Et waren och vill Muséeën zoubliwwen.

Eng sëlleche Politiker vun ënnerschiddleche Parteien haten d'Demonstranten opgeruff, op Gewalt ze verzichten.



Et ass elo schonn de 4. Weekend hannerteneen, op dem d'Gilets Jaunes op d'Stroosse ginn, fir ze protestéieren.

D'lescht Woch haten et wärend den Demonstratiounen zu Paräis uerg Stroosseschluechte mat der Police ginn. Iwwer 400 Persoune waren interpelléiert ginn.



Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.